លោកជំទាវ មិថុនា ភូថង៖ ស្រ្តីក្រៅតែពីមានចំណេះដឹងសមត្ថភាព និងចេះប្រើប្រាស់បច្ចេកវិទ្យា គឺត្រូវមានសុខភាពល្អ

ភ្នំពេញ៖ លោកជំទាវ មិថុនា ភូថង អភិបាលខេត្តកោះកុង បានលើកឡើងថា ស្រ្តីក្នុងជួរមន្រ្តីរាជការ និងវិស័យឯកជនមានឱកាសច្រើនហើយ ក្រៅតែពីមាន ចំណេះដឹងសមត្ថភាព និងចេះប្រើប្រាស់បច្ចេកវិទ្យាគឺត្រូវមានសុខភាពល្អ។

ការលើកឡើវរបស់លោកជំទាវ មិថុនា ភូថង បែបនេះ ក្នុងឱកាសអញ្ជើញចូលរួមជាមួយមនុស្សជិត ១ពាន់នាក់ រត់ប្រណាំងនៅវិថីសាយ ភូថង ក្នុងស្រុកបូទុមសាគរ ខេត្តកោះកុង ដើម្បីប្រមូលមូលនិធិជួយអភិវឌ្ឍន៍សហគមន៍តំបន់ការពារធម្មជាតិពាមក្រសោប និង អបអរសាទរទិវានារីអន្តរជាតិ ៨មីនា ឆ្នាំ២០២៤។

នៅថ្ងៃទី៩ ខែមីនា ឆ្នាំ២០២៤នេះ ប្រជាពលរដ្ឋមកពីគ្រប់ទិសទីបានប្រមូលផ្តុំរត់ប្រណាំងរយៈចម្ងាយ ៨គីឡូម៉ែត្រចាប់ពីភូមិជីត្រេះ ឃុំអណ្តូងទឹកដល់រង្វង់មូលវិថី សាយ ភូថង ក្រោមការរៀបចំរបស់រដ្ឋបាលខេត្តកោះកុង អាជ្ញាធរ សមត្ថកិច្ច ស្រុក បូទូមសាគរ និងសហការជាមួយវិស័យឯកជន។

លោកជំទាវ មិថុនា ភូថង អភិបាលខេត្តកោះកុង បានឱ្យដឹងថា ការរត់ប្រណាំងមានបុរសស្រ្តីនេះ ធ្វើឡើងដើម្បីអបអរសាទរទិវាអន្តរជាតិនារី ៨មីនាផង និងប្រមូល មូលនីធិជួយអភិវឌ្ឍន៍សហគមន៍តំបន់ការពារធម្មជាតិពាមក្រសោបផង។

តំណាងអ្នកដែលរត់ប្រណាំងលើកឡើង ថា កម្មវិធីរត់ប្រណាំងនេះ ពិតជារៀបចំមានសណ្តាប់ធ្នាប់សន្តិសុខល្អប្រសើរ។ កីឡារត់ ប្រណាំងពិតជាផ្តល់នូវអត្ថប្រយោជន៍ជាច្រើនជួយឱ្យសុខភាពល្អ។

សូមបញ្ជាក់ថា នេះជាលើកដំបូងហើយដែលរដ្ឋបាលខេត្តបានរៀបចំឡើងសម្រាប់ពលរដ្ឋ ព្រម ទាំង អ្នក ទេសចរ គ្រប់ស្រទាប់វណ្ណៈមកពីគ្រប់តំបន់ចូលរួមយ៉ាងសប្បាយរីករាយ មានសុខភាពល្អ ក៏ដូចជាផ្សព្វ ផ្សាយពីសក្តានុពលវិស័យទេសចរណ៍ផងដែរ៕