ប្រមុខរាជរដ្ឋាភិបាល ណែនាំឲ្យរៀបចំភ្លេងឆៃយាំ ស្វាគមន៍អ្នកទេសចរ នៅតាមព្រលានយន្តហោះ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំឲ្យរៀបចំភ្លេងឆៃយាំ ស្វាគមន៍អ្នកទេសចរ នៅតាមព្រលានយន្តហោះ ដែលជាការស្វាគមន៍ មុនចូលមកលេងកម្សាន្តនៅកម្ពុជា។

សម្តេចធិបតី បានណែនាំបែបនេះ ក្នុងឱកាសដែលសម្តេចអញ្ជើញបើកពិធីបុណ្យទន្លេលើកទី៨ នៅក្នុងខេត្តសៀមរាប នាយប់ថ្ងៃទី១៦ ខែមីនា ឆ្នាំ២០២៤។

សម្តេចធិបតី ហ៊ុន ម៉ាណែត បានបញ្ជាក់ថា សម្តេចបានឲ្យគោលគំនិតទៅឯកឧត្ដម សុខ សូកេន រដ្ឋមន្ត្រីក្រសួងទេសចរណ៍ ពេលបុណ្យចូលឆ្នាំថ្មី ខាងមុខនេះ ត្រូវរៀបចំភ្លេងឆៃយាំ ស្វាគមន៍ភ្ញៀវនៅព្រលានយន្ដហោះ ដែលជាកាដូជូនគាត់ ជាអនុស្សាវរីយ៍មុនគេ ពេលគាត់មកដល់ទឹកដីកម្ពុជា មិនមែនតែខេត្ដសៀមរាប គឺគ្រប់ខេត្ដទាំងអស់ ទាំងនៅរាជធានីភ្នំពេញ។

បន្ថែមពីនោះទៀត សម្តេចធិបតី ហ៊ុន ម៉ាណែត ក៏បានណែនាំឲ្យមានការរៀបចំភ្លេងឆៃយាំ ដើម្បីស្វាគមន៍ភ្ញៀវទេសចរ នៅគ្រប់ខេត្ដ-រាជធានី ទាំងអស់តែម្ដង។

សម្តេចធិបតី នាយករដ្ឋមន្ត្រី បានលើកឡើងថា ការស្វាគមន៍ភ្ញៀវ នៅព្រលានយន្ដហោះ គឺជាកិច្ចការសំខាន់ ដែលអាចឲ្យមនុស្សប្ដូរចិត្ដ ពីការមកលេង១ថ្ងៃ ទៅជា៥ថ្ងៃ ឬមួយពី៥ថ្ងៃ មក១ថ្ងៃវិញ ដែលនេះ ជាកិច្ចការសំខាន់។

ទន្ទឹមគ្នានេះ សម្តេចធិបតី នាយករដ្ឋមន្ត្រី បានបញ្ជាក់ថា សម្ដេចបានបង្កើតគណៈកម្មាធិការថ្មីមួយ ដែលដឹកនាំ ដោយឧបនាយករដ្ឋមន្ដ្រី នេត សាវឿន ដើម្បីដឹកនាំរួម ទាំងការងារសន្ដិសុខ និងបដិសណ្ឋាកិច្ច នៅតាមព្រលានយន្ដហោះទាំងអស់ ដើម្បីធ្វើយ៉ាងណា ឲ្យកាន់តែល្អប្រសើរ ៕