ឯកឧត្ដម ឃួង ស្រេង ណែនាំដល់ម្ចាស់យាន្តដ្ឋាន ក្នុងរាជធានីភ្នំពេញត្រូវបញ្ឈប់ ការកែច្នៃស៊ីផ្លេ និងបំពង់ស៊ីមុំាងខុសបច្ចេកទេស ចៀសវាងរងការផាកពិន័យ
ភ្នំពេញ៖ ឯកឧត្ដម ឃួង ស្រេង អភិបាលរាជធានីភ្នំពេញ បានដាក់ចេញគោលការណ៍ដល់ម្ចាស់យាន្តដ្ឋាន ក្នុងរាជធានីភ្នំពេញត្រូវបញ្ឈប់ ការកែច្នៃស៊ីផ្លេ និងបំពង់ស៊ីមុំាងខុសបច្ចេកទេស ចៀសវាងរងការផាកពិន័យឬឈានទៅបិទអាជីវកម្ម។
ការណែនាំបែបនេះធ្វើឡើងក្នុងប្រជុំបន្ទាន់ដើម្បីត្រួតពិនិត្យលើ និងទប់ស្កាត់ រឿងរថយន្តកែច្នៃស៊ីផ្លេរខុសបច្ចេកទេស បង្កភាពអនាធិបតេយ្យតាមដងផ្លូវសាធារណៈ នារសៀលថ្ងៃទី១៨ ខែមីនា ឆ្នាំ២០២៤នេះ ដោយមានការចូលរួមពីអភិបាលខណ្ឌទាំង១៤ មន្ទីរពាក់ព័ន្ធ និងកងកម្លាំងប្រដាប់អាវុធចំណុះអោយគណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ។
នៅក្នុងកិច្ចប្រជុំនេះ ឯកឧត្ដមអភិបាលរាជធានីភ្នំពេញ បានណែនាំដល់អ្នកដែលបានប្រើប្រាស់ស៊ីផ្លេ ឬបំពង់ស៊ីមុំាងខុសបច្ចេកទេ ត្រូវរួសរាន់ដកចេញវិញជាបន្ទាន់ ដើម្បីកុំឱ្យរងការផាកពិន័យ និងបានណែនាំដល់ម្ចាស់អាជីវកម្មលក់ដូរបំពង់ស៊ីមុំាង និងស៊ីផ្លេដែលខុសបច្ចេកទេសត្រូវបញ្ឈប់ការលក់ដូរ ហើយ ម្ចាស់យាន្តដ្ឋាននានា ក្នុងរាជធានីភ្នំពេញត្រូវបញ្ឈប់ ការកែច្នៃស៊ីផ្លេ និងបំពង់ស៊ីមុំាងខុសបច្ចេកទេស ដើម្បីកុំឱ្យរងការផាកពិន័យ ឬឈានទៅបិទអាជីវកម្ម បន្ទាប់ពីរដ្ឋបាលរាជធានីភ្នំពេញចេញសេចក្តីជូនដំណឹង នាពេលដ៏ខ្លីខាងមុខ។
ឯកឧត្ដមឃួង ស្រេង បានថ្លែងថា ការប្រើប្រាស់ស៊ីផ្លេ និងបំពង់ស៊ីមុំាងខុសបច្ចេកទេសនេះ គឺបានបង្កការរំខានយ៉ាងខ្លាំងដល់សណ្តាប់ធ្នាប់សាធារណនៅតាមដងផ្លូវ ដែលសមត្ថកិច្ចត្រូវតែពង្រឹងការផាក ពិនិត្យឱ្យបានម៉ឹងម៉ាត់ជាទីបំផុត។
នាឱកាសនោះ ឯកឧត្ដម ឃួង សេ្រងក៏បានជំរុញឲ្យអាជ្ញាធរខណ្ឌទាំង១៤ ក៏ដូចជាសមត្ថកិច្ចពាក់ព័ន្ធ ត្រួតពិនិត្យឡើងវិញ ចំពោះអាជីវកម្មក្លឹបកំសាន្ត ក៏ដូចជាបៀរហ្គាឌិន ជាដើម ដែលបង្កសំឡេងរំខានដល់ប្រជាពលរដ្ឋដែរ។ ដោយឡែកចំពោះ ល្បែងស៊ីសងគ្រប់ប្រភេទ ក៏ត្រូវតែបង្ក្រាបអោយដូចភ្លៀងរលឹមនៅក្នុងមូលដ្ឋានរបស់ខ្លួនផងដែរ៕
