ក្រុមការងារភ្នាក់ងារទេសចរ ប្រចាំគោលដៅប្រាសាទអង្គរវត្ត សហការជាមួយនគរបាលទេសចរណ៍ និងនគរបាលបេតិកភណ្ឌ ប្រគល់កាបូបជូនភ្ញៀវដែលបានភ្លេច

ភ្នំពេញ៖ នៅព្រឹកថ្ងៃទី១៩ ខែមីនា ឆ្នាំ២០២៤នេះ នៅគោលដៅប្រាសាទអង្គរវត្ត មានមគ្គុទ្ទេសក៍ទេសចរណ៍ជនជាតិខ្មែរភេទប្រុស ឈ្មោះ ជា មាន រើសបានកាបូបស្ពាយក្រោយពណ៍ខ្មៅមួយ មកប្រគល់ជូនភ្នាក់ងារទេសចរប្រចាំនៅជណ្ដើរឡើងរួតបាណ។

លុះក្រោយមក ម្ចាស់កាបូបជនជាតិអឺរ៉ុបម្នាក់ ភេទប្រុស មកពីសាធារណរដ្ឋឆេក បានមករកវិញ ដោយពិនិត្យឃើញថា ជារបស់គាត់ពិតប្រាកដមែន ក្រុមភ្នាក់ងារទេសចរ បានសហការជាមួយនគរបាលទេសចរណ៍ និងនគរបាលបេតិកភណ្ឌ ធ្វើការប្រគល់ជូនម្ចាស់វិញនៅវេលាថ្ងៃដដែល។

អាជ្ញាធរជាតិអប្សរាសូមថ្លែងអំណរគុណចំពោះមគ្គុទ្ទេសក៍ទេសចរណ៍ ក៏ដូចជាប្រជាពលរដ្ឋខ្មែរ ដែលតែងតែរក្សាបាននូវតម្លៃវប្បធម៌ដ៏ល្អផូរផង់មួយនេះ ហើយវប្បធម៌នេះគឺជាការបង្ហាញនៅទំនុកចិត្តសម្រាប់ភ្ញៀវទេសចរ ដែលបានអញ្ជើញមកទស្សនានៅក្នុងរមណីយដ្ឋានអង្គរ៕