ព្រះធម្មវជ្ជា ជួន កក្កដា និងព្រះសង្ឃភិរ័ត្ន ភិន វុទ្ធី ចែកទានដល់ពលរដ្ឋក្រីក្រ ៧៥៥គ្រួសារ នៅស្រុកសំរោង នៅខេត្តតាកែវ
ភ្នំពេញ៖ ព្រះធម្មវជ្ជា ជួន កក្កដា ព្រះវិន័យធរគណខេត្តតាកែវ នាយកសាលាពុទ្ធិកបឋមសិក្សាវត្តប្រាសាទនាងខ្មៅ និងព្រះសង្ឃភិរ័ត្ន ភិន វុទ្ធី ព្រះចៅអធិការវត្តប្រាសាទនាងខ្មៅ បានចែកទានដល់ប្រជាពលរដ្ឋក្រីក្រ ៧៥៥គ្រួសារ នៅស្រុកសំរោង នៅខេត្តតាកែវ។ ពិធីចែកទាននេះធ្វើឡើងនៅថ្ងៃទី២១ ខែមីនា ឆ្នាំ២០២៤ នាវត្តប្រាសាទនាងខ្មៅ ភូមិចារ ឃុំរវៀង ស្រុកសំរោង ខេត្តតាកែវ ។
គួររំលឹកដែរថា កន្លងមកនេះ ព្រះធម្មវជ្ជា ជួន កក្កដា និងព្រះសង្ឃភិរ័ត្ន ភិន វុទ្ធី ទាំងពីរអង្គ បានចូលរួមចំណែកអភិវឌ្ឍលើវិស័យធនធានព្រះសង្ឃ អប់រំមនុស្សតាមសំឡេងព្រះធម៌ និងវិស័យផ្សេងៗទៀតនៅក្នុងស្រុកសំរោង ខេត្តតាកែវ។
តាមសង្ឃដីការបស់អង្គបានអោយដឹងថា ទេយ្យវត្ថុ និងទេយ្យទាន ទាំងអស់នេះទទួលបានពីបងប្អូនពុទ្ធបរិស័ទគ្រប់មជ្ឈិដ្ឋាន ដែលបានមកចូលរួមឧបត្ថម្ភដល់ព្រះសង្ឃគង់សិក្សារៀនសូត្រនៅទីនេះ ហើយជាការបង្ហាញពីវប្បធម៌ចែករំលកគ្នាទៅវិញទៅមក ។
ទេយ្យវត្ថុដែលប្រជាពលរដ្ឋទទួលបាន ក្នុងមួយគ្រួសារៗ រួមមាន អង្គរ ២៥គីឡូ និងគ្រឿងឧបភោគបរិភោគ ចំនួន ១០មុខ និងថវិកា ១ម៉ឺនរៀល ៕
