ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក អញ្ជើញរួមដំណើរចុះបេសកកម្មជាមួយគណៈកម្មការទី៣ នៃរដ្ឋសភា នៅខេត្តបាត់ដំបង

ភ្នំពេញ៖ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក និងឧតុនិយម អមដំណើរដោយឯកឧត្តម ជួន ប៊ិតថុល អនុរដ្ឋលេខាធិការ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេស មន្រ្តីបច្ចេកទេសក្រសួងនិងមន្ទីរធនធានទឹក និងឧតុនិយមខេត្តបាត់ដំបងបានអញ្ជើញចូលរួមដំណើរបេសកកម្មជាមួយគណៈកម្មការទី៣ នៃរដ្ឋសភា នៅខេត្តបាត់ដំបង។

សូមជម្រាបថា គណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា ដឹកនាំដោយឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ បានអញ្ជើញចុះបំពេញបេសកកម្មនៅខេត្តបាត់ដំបង ក្នុងគោលបំណងដើម្បីសិក្សាឈ្វេងយល់អំពីការអភិវឌ្ឍ បញ្ហាប្រឈមនានារបស់រដ្ឋបាលខេត្ត និងមន្ទីរ អង្គភាពជំនាញដែលពាក់ព័ន្ធនឹងសមត្ថកិច្ចរបស់គណៈកម្មការទី៣ នៃរដ្ឋសភា ក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា។

បន្ទាប់ពីឈ្វេងយល់ពីស្ថានភាពទូទៅរបស់ខេត្តបាត់ដំបង តាមរយៈរបាយការណ៍សង្ខេបរបស់ឯកឧត្តម សុខ លូ អភិបាលនៃគណៈអភិបាលខេត្តបាត់ដំបងអំពីសភាពការណ៍រួមរបស់វិស័យពាក់ព័ន្ធនានា សក្តានុពល វឌ្ឍនភាព និងបញ្ហាប្រឈម ក្នុងកិច្ចប្រជុំនាសាលាខេត្តបាត់ដំបងរួច គណៈប្រតិភូគណៈកម្មការទី៣ នៃរដ្ឋសភា ដឹកនាំដោយឯកឧត្តមសន្តិបណ្ឌិត ឡូយ សុផាត បានអញ្ជើញចុះពិនិត្យមើលទំនប់សេកសក ស្ថិតនៅភូមិទឹកសាប ឃុំផ្លូវមាស ស្រុករតនមណ្ឌល និងប្រព័ន្ធធារាសាស្ត្រកង្ហត ស្ថិតនៅភូមិទួលអណ្តែត ឃុំចែងមានជ័យ ស្រុកបាណន់ ខេត្តបាត់ដំបង។

ក្នុងឱកាសនោះ ឯកឧត្តមរដ្ឋលេខាធិការប្រចាំការ បានជម្រាបជូនគណៈប្រតិភូគណៈកម្មការទី៣ នៃរដ្ឋសភាថា ការកសាងអាងទឹកឱ្យបានច្រើនពិតជាមានសារសំខាន់ណាស់ ដោយសារប្រទេសយើងមានរាងជាបាតខ្ទះ បើយើងកសាងអាងទឹកច្រើននៅផ្នែកខាងលើពិតជាមានសក្តានុពលខ្លាំង ដោយយើងមិនបាច់បូមទឹកពីអាងទន្លេសាប។

ឯកឧត្តមសន្តិបណ្ឌិតប្រធានគណៈប្រតិភូបានថ្លែងនូវការកោតសរសើរដល់ការរីកចម្រើនយ៉ាងឆាប់រហ័ស នៅខេត្តបាត់ដំបង និងបានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញភារកិច្ចយ៉ាងសកម្មរបស់ខេត្ត និងមន្ទីរ អង្គភាពពាក់ព័ន្ធរហូតសម្រេចបានលទ្ធផលត្រចះត្រចង់ជូនប្រជាពលរដ្ឋនៅក្នុងខេត្តទាំងមូល។

គួរបញ្ជាក់ថា ទំនប់ពហុបំណងសេកសក ស្ថិតនៅប៉ែកខាងលើនៃស្ទឹងសង្កែ ស្ថិតក្នុងឃុំផ្លូវមាស ស្រុករតនមណ្ឌល ខេត្តបាត់ដំបង មានសក្តានុពលក្នុងការផ្គត់ផ្គង់ទឹកឱ្យដល់តំបន់អាងទឹកកំពីងពួយ ក្នុងស្រុកបាណន់ និងបញ្ជូនទឹកទៅកាន់ស្រុកគាស់ក្រឡ និងស្រុកមោងឫស្សី តាមរយៈប្រព័ន្ធធារាសាស្រ្តកង្ហត។

ទន្ទឹមនឹងនេះ ក្រសួងធនធានទឹក និងឧតុនិយមក៏មានគម្រោងសាងសង់ទំនប់អាងទឹកស្ទឹងក្រញូង នៃប្រព័ន្ធធារាសាស្រ្តស្ទឹងក្រញូងដែលមានទីតាំងស្ថិតនៅក្នុងភូមិសាស្រ្តឃុំតាតោក ស្រុកសំឡូត ខេត្តបាត់ដំបង ដែលអាចស្តុកទឹកបានចំនួន ៥០០លានម៉ែត្រត្រីគុណ ធានាដល់ការប្រើប្រាស់លើគ្រប់វិស័យក្នុងតំបន់សំឡូត រតនមណ្ឌល និងប៉ៃលិន និងជួយផ្គត់ផ្គង់ទឹកបន្ថែមដល់ទំនប់អាងទឹកសេកសក តំបន់កង្ហត មោងឬស្សី ព្រែកជីក គាស់ក្រឡ សាលាតាអន ឯកភ្នំ អន្លង់វិល សង្កែ ជាពិសេសបង្កើនបានជាអតិបរិមានូវបរិមាណទឹកដ៏ច្រើនបំផុតឱ្យតំបន់អាងទឹកកំពីងពួយ ៕