សម្តេចធិបតី ស្នើភាគីឡាវពិនិត្យលទ្ធភាពនាំចូលទំនិញមួយចំនួនពីកម្ពុជា ពិសេសភេសជ្ជៈ

ភ្នំពេញ៖ ឯកឧត្ដម ហ្សង់ ហ្វ្រង់ស័រតាន់ រដ្ឋមន្រ្តីប្រតិភូអមនាយករដ្ឋមន្រ្តី បានលើកឡើងថា ក្នុងជំនួបពិភាក្សាការងារជាមួយនាយករដ្ឋមន្ត្រីឡាវ ឯកឧត្ដម សនសៃ ស៊ីផាន់ដន សម្តេចធិបតី ហ៊ុន ម៉ាណែត នាយករដមន្ត្រីនៃកម្ពុជា បានស្នើភាគីឡាវ ឱ្យពិនិត្យលទ្ធភាពនាំចូលទំនិញមួយចំនួនពីកម្ពុជា ខណៈភេសជ្ជៈជាទំនិញមានសក្តានុពលខ្ពស់ និងសម្បូរបែបនៅកម្ពុជា។

ឯកឧត្ដម ហ្សង់ ហ្វ្រង់ស័រតាន់ បានថ្លែងបែបនេះក្នុងសន្និសីទសារព័ត៌មាន នៅព្រលានយន្តហោះអន្តរជាតិភ្នំពេញ ដើម្បីបង្ហាញលទ្ធផល នៃទស្សនកិច្ចរបស់សម្តេចធិបតី ហ៊ុន ម៉ាណែត នារសៀលថ្ងៃទី២៦ ខែកុម្ភៈ ឆ្នាំ២០២៤។

ឯកឧត្ដ ហ្សង់ ហ្វ្រង់ស័រតាន់ បានឱ្យដឹងថា ដូចគ្នា ដើម្បីបង្កើនទំហំពាណិជ្ជកម្មកម្ពុជា-ឡាវ សម្តេចធិបតី ហ៊ុន ម៉ាណែត ក៏បានស្នើមិត្តឡាវ ឱ្យពិនិត្យមើលលទ្ធភាពពង្រីកការធ្វើសមាហរណកម្មសេដ្ឋកិច្ចតាមរយៈការផ្លាស់ប្តូរពាណិជ្ជកម្ម សេវាកម្ម ដូចជាសេវាហិរញ្ញវត្ថុ សេវាដឹកទំនិញផ្លូវគោក និងទេសចរណ៍។

ឯកឧត្ដម ហ្សង់ ហ្វ្រង់ស័រតាន់ ក៏បានលើកឡើងដែលថា នៅក្នុងដំណើរបំពេញទស្សនកិច្ចនៅប្រទេសឡាវ សម្តេចធិបតី ហ៊ុន ម៉ាណែត និងនាយករដ្ឋមន្ត្រីឡាវ បានពិភាក្សាគ្នាលើសារៈសំខាន់នៃការរៀបចំកិច្ចប្រជុំលើកទី១៥ នៃគណៈកម្មការរួមសម្រាប់កិច្ចសហប្រតិបត្តិការ JCBC, ការដាក់ឱ្យដំណើរការឡើងវិញ គណៈកម្មការពាណិជ្ជកម្មចម្រុះ ជាមួយការរៀបចំវេទិកាធុរកិច្ច និងវិនិយោគ និងការពង្រីកសមាហរណកម្មសេដ្ឋកិច្ច តាមរយៈការផ្លាស់ប្តូរពាណិជ្ជកម្មលើវិស័យសេវាកម្ម ដូចជាសេវាហិរញ្ញវត្ថុ ដឹកទំនញផ្លូវគោក និងទេសចរណ៍៕