វិទ្យាស្ថានតេជោសែន សាធារណការ និងដឹកជញ្ជូន រៀបចំសិក្ខាសាលាស្តីពី “ការរៀបចំផែនការថវិកាកម្មវិធី” ជូនថ្នាក់ដឹកនាំមន្ត្រី និងបុគ្គលិកកិច្ចសន្យាក្រោមឱវាទ
ភ្នំពេញ៖ នៅទីស្តីការក្រសួងនាព្រឹកថ្ងៃពុធ ទី២៧ ខែមីនា ឆ្នាំ២០២៤ ឯកឧត្តម ឡាវ វ៉ាន់ រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងកម្មវិធីបើកសិក្ខាសាលាស្តីពី “ការរៀបចំផែនការថវិកាកម្មវិធី” ជូនដល់ថ្នាក់ដឹកនាំ មន្ត្រី និងបុគ្គលិកកិច្ចសន្យា របស់វិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមផងដែរពី ឯកឧត្តមអនុរដ្ឋលេខាធិការ គណៈគ្រប់គ្រងវិទ្យាស្ថាន តំណាងអគ្គនាយកដ្ឋាន/នាយកដ្ឋានពាក់ព័ន្ធ និងនិស្សិតដែលកំពុងសិក្សាក្នុងវិទ្យាស្ថានមួយចំនួនផ្សេងទៀត។
សិក្ខាសាលាដែលប្រព្រឹត្តទៅរយៈពេល ២ថ្ងៃនេះ ត្រូវបានរៀបចំដោយផ្ទាល់នៅ សាលសហសិក្សាតេជោសែន នៃវិទ្យាស្ថានតេជោសែន សាធារណការ និងដឹកជញ្ជូន ក្នុងគោលបំណងផ្ដល់នូវចំណេះដឹង និងអត្ថប្រយោជន៍ជាមូលដ្ឋាន ក្នុងការរៀបចំផែនការថវិកា និងហិរញ្ញវត្ថុ ឱ្យបានត្រឹមត្រូវគ្រប់ជ្រុងជ្រោយ និងប្រសិទ្ធភាពការងារខ្ពស់៕
