នាយករដ្ឋមន្ត្រី ហ៊ុន ម៉ាណែត៖ កត្តាសំខាន់ជួយឱ្យការអប់រំទទួលបានផលល្អ គឺទំនាក់ទំនងរវាងគ្រូ អាណាព្យាបាល ជាមួយសិស្ស

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ទំនាក់ទំនងរវាងគ្រូ អាណាព្យាបាល ជាមួយសិស្ស ជាកត្តាសំខាន់ជួយឱ្យការអប់រំទទួលបានផលល្អប្រសើរ។

ក្នុងឱកាស អញ្ជើញបិទសន្និបាតក្រសួងអប់រំ យុវជន និងកីឡា នាថ្ងៃទី២ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បញ្ជាក់ថា «ការចូលរួមរបស់ឪពុកម្តាយ ក៏មិនចាំបាច់ក្នុងរូបភាព ជាថវិកាត្រូវចូលដែរ។ ឱ្យតែគាត់ជួយប្រដៅកូនគាត់ ឱ្យខំប្រឹងបង្រៀន ខ្ញុំថាល្អហើយ។ ឱ្យតែជួយជំរុញឱ្យកូនគាត់ គោរពវិន័យសាលាល្អហើយ។ អ្វី ដែលលោកគ្រូអ្នកគ្រូចង់បាន គឺជាទំនាក់ទំនងល្អ ប្រទាក់ក្រឡាជាមួយឪពុកម្តាយ។ ឥឡូវ ខ្ញុំឃើញបញ្ហាធំបំផុត ជាពិសេសនៅក្រុង គឺការផ្តាច់គ្នារវាងឪពុកម្តាយ និងសិស្ស។ ជំនាន់ខ្ញុំ បើត្រូវរំពាត់ពីសាលា ទៅពន្យល់ប្រាប់ពុក គាត់វាយថែម។ គាត់ជឿទុកចិត្តថា លោកគ្រូអ្នកគ្រូ ប្រដៅកូនគាត់ខុសទេ»។

សម្តេចបន្ថែមថា «ថ្ងៃមុន ខ្ញុំឃើញនៅខេត្តកណ្តាល កូនសិស្សធ្វើខុសលោកគ្រូប្រដៅទៅ ស្រាប់តែកូនទៅដល់ម្តាយ ម្តាយស្រលាញ់កូនផង អត់ទាន់ដឹងអី ដាក់គ្រូមួយប្រ៉ាវតាមហ្វេសប៊ុក ទម្រាំតែយល់គ្នា។ តែបើគ្រូ និងសិស្ស ឪពុកម្តាយ មានទំនាក់ទំនងស្រួលណាស់»។

សម្តេចធិបតី គូសបញ្ជាក់ថា ឪពុកម្តាយ និងសិស្ស ជាតួអង្គក្នុងការអប់រំ។ ការអប់រំនៅសាលា និងនៅផ្ទះ ជាកត្តាខ្លាំងណាស់ ដើម្បីជួយលុយបំបាត់ឥទ្ធិពលពីសង្គមខាងក្រៅ។ អប់រំមានតែ ៣ទេ​ នៅផ្ទះ នៅសាលា និងនៅក្នុងសង្គម។ បើសាលា និងផ្ទះ ឯកភាពគ្នាពង្រឹងហើយ ឥទ្ធិពលសង្គមយ៉ាងម៉េច ក៏ចូលមិនរួចដែរ ព្រោះនៅសង្គម មានរឿងច្រើនណាស់ ដែលយុវជន ជាពិសេសក្មេងៗ ចាប់យក តើមួយណាល្អ មួយណាអាក្រក់ ក៏មិនដឹងដែរ ៕