ឧបនាយករដ្ឋមន្ត្រី សុខ ចិន្តាសោភា ផ្ញើសារលិខិតអបអរសាទរ និងគោរពជូនសម្តេចតេជោ ហ៊ុន សែន ក្នុងឱកាសដែលអង្គព្រឹទ្ធសភាបោះឆ្នោតជ្រើសរើស ជាប្រធានព្រឹទ្ធសភា
ភ្នំពេញ៖ ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានផ្ញើសារលិខិតអបអរសាទរ និងគោរពជូនសម្តេចអគ្គមហាសេនាបតីតេជោ ហ៊ុន សែន ក្នុងឱកាសដែលសម្ដេចតេជោ ត្រូវបានអង្គព្រឹទ្ធសភាបោះឆ្នោតជ្រើសរើស ជាប្រធានព្រឹទ្ធសភា នីតិកាលទី៥ នៃព្រះរាជាណាចក្រកម្ពុជា។
តាងនាមថ្នាក់ដឹកនាំ មន្ត្រីរាជការ បុគ្គលិក នៃក្រសួងការបរទេស និងសហប្រតិបត្តិការអន្តរជាតិ ព្រមទាំង មន្ត្រីការទូតទាំងអស់នៅតាមបណ្តាស្ថានតំណាងកម្ពុជានៅបរទេស និងក្នុងនាមខ្ញុំបាទផ្ទាល់ ខ្ញុំបាទសូមសម្តែង នូវសេចក្តីសោមនស្សរីករាយឥតឧបមា និងសូមចូលរួមអបអរសាទរយ៉ាងជ្រាលជ្រៅបំផុតក្នុងឱកាសដែលសម្តេចអគ្គមហាសេនាបតីតេជោ ត្រូវបានអង្គព្រឹទ្ធសភាបោះឆ្នោតជ្រើសរើសជា ប្រធានព្រឹទ្ធសភា នីតិកាលទី៥ នៃព្រះរាជាណាចក្រកម្ពុជា។
ការទទួលបាននូវមុខដំណែងដ៏ឧត្តុង្គឧត្តមជា ប្រធានព្រឹទ្ធសភា គឺពិតជាស័ក្តិសមជាទីបំផុតសម្រាប់ សម្តេចតេជោ ក្នុងនាមជាអគ្គមគ្គទេសក៍ដ៏ឆ្នើម វាងវៃ និងជាទីគោរពស្រឡាញ់របស់ប្រជាជន តាមរយៈ ការដឹកនាំដ៏ប៉ិនប្រសប់ ដែលបង្កើតបាននូវសមិទ្ធផលជាច្រើនឥតគណនា នាំឱ្យប្រទេសជាតិមានសុខសន្តិភាព ពេញលេញ ការអភិវឌ្ឍរីកចម្រើនគ្រប់វិស័យ និងកិត្តិសព្ទល្បីរន្ទឺនៅលើឆាកអន្តរជាតិ។
ឆ្លៀតក្នុងឱកាសដ៏ប្រពៃថ្លៃថ្លានេះ យើងខ្ញុំទាំងអស់គ្នា សូមឧទ្ទិសបួងសួងដល់គុណបុណ្យព្រះរតនៈត្រ័យ និង វត្ថុស័ក្តិសិទ្ធិទាំងឡាយក្នុងលោក សូមមេត្តាតាមជួយបីបាច់ថែរក្សា និងប្រោះព្រំសព្ទសាធុការពរ បវរសួស្តី ជ័យមង្គល វិបុលសុខ មហាប្រសើរគ្រប់ប្រការជូនចំពោះ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង បុត្រា បុត្រី និងចៅប្រុស ចៅស្រី ជាទីស្រឡាញ់ទាំងអស់ សូមមានសុខភាពល្អបរិបូរណ៍ និងសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
សូម សម្តេចអគ្គមហាសេនាបតីតេជោ ប្រធានព្រឹទ្ធសភា មេត្តាទទួលនូវការគោរពដ៏ស្ម័គ្រស្មោះ ពីយើងខ្ញុំទាំងអស់គ្នា ៕