សម្តេចធិបតី៖ រដ្ឋធម្មនុញ្ញកម្ពុជា គឺមិនអនុញ្ញាតឱ្យប្រទេសណាមួយមកដាក់ទីតាំងកងទ័ពនៅលើទឹកដីកម្ពុជាឡើយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា រដ្ឋធម្មនុញ្ញរបស់កម្ពុជា គឺមិនអនុញ្ញាតឱ្យប្រទេសណាមួយមកដាក់ទីតាំងកងទ័ពនៅលើទឹកដីកម្ពុជាហើយប្រឆាំងនឹងប្រទេសដទៃនោះទេ។

ក្នុងពិធីអញ្ជើញជាអធិបតីសម្ពោធកសិដ្ឋានចិញ្ចឹមគោយកទឹកដោះ «គិរីសួគ៌» ស្ថិតនៅភូមិឱភាសាំង ឃុំកណ្តឹង ស្រុកបាទី ខេត្តតាកែវ នាព្រឹកថ្ងៃទី១១ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានបន្ថែមទៀតថា ម្យ៉ាងទៀតនាវាចម្បាំងធំៗមិនអាចចូលចតនៅ “ព្រែកជីកហ្វូណនតេជោ” បានឡើយ ព្រោះតែនាវាចម្បាំងមានទំហំធំ លើសពីទំហំព្រែកជីកហ្វូណនតេជោ ដែលមានមុខកាត់ប្រមាណមួយរយម៉ែត្រ និងជម្រៅត្រឹមប្រមាណប្រាំម៉ែត្រប៉ុណ្ណោះ ។