សម្តេចធិបតី ហ៊ុន ម៉ាណែត៖ ខ្ញុំនៅតែបន្តទាក់ម៉ូយតទៅទៀត ទោះបីក្រុមប្រឆាំងមិនសប្បាយចិត្តក្តី

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា សម្តេចនឹងនៅតែបន្តដើរទាក់ម៉ូយតទៅទៀតទោះបីក្រុមប្រឆាំងមិនសប្បាយចិត្តក្តី ដើររកអ្នកវិនិយោគមកធ្វើការវិនិយោគនៅក្នុងស្រុកឱ្យបានកាន់តែច្រើនបន្ថែមទៀត ហើយការដើរទាក់ម៉ូយនេះដើម្បីធ្វើយ៉ាងណាឱ្យកូនចៅជំនាន់ក្រោយកាន់តែមានសមិទ្ធផលបានកាន់តែច្រើនថែមទៀត។

នាឱកាសអញ្ជើញជាអធិបតីក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នាថ្ងៃទី១១ ខែមេសា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត បានបញ្ជាក់ថា «គេវៃខ្ញុំពីរ មានរឿងទាក់ម៉ូយ និងរឿងអួត ឥលូវខ្ញុំបន្តប្រើពាក្យនេះព្រោះខ្ញុំមានមោទនភាព ហើយទាក់ម៉ូយខ្ញុំនៅបន្តនិយាយព្រោះខ្ញុំនៅដើរទាក់ម៉ូយមែន ទៅបញ្ចុះបញ្ចូល តែទាំងអស់នេះគឺជាសមិទ្ធផលរួមរបស់ជាតិរបស់យើង»។

សម្តេចបន្ថែមថា ការដើរទាក់ម៉ូយនេះគឺយកមកឱ្យប្រជាពលរដ្ឋ និងកសិរមានការងារធ្វើ ហើយសម្តេចនឹងនៅតែបន្តដើរទាក់ម៉ូយតទៅទៀត ព្រោះលទ្ធផលនៃការដើរទាក់ម៉ូយនេះគឺធ្វើឱ្យអ្នកដែលនៅវិនិយោគស្រាប់បានកាន់តែជោគជ័យ តាមរយៈការជជែកជាមួយអ្នកដែលចង់មកវិនិយោគបន្ថែម ដែលនេះគឺជាលទ្ធផលដែលបានយ៉ាងធំធេងណាស់។

សម្តេចមហាបវរធិបតី លើកឡើងថា សម្តេចនឹងនៅតែបន្តអួតតទៅទៀត និងនៅតែបន្តទាក់ម៉ូយតទៅទៀត និងត្រូវរួមគ្នាទាក់ម៉ូយថែមទៀត ដើម្បីកូនចៅយើងកាន់តែមានសមិទ្ធផលបានកាន់តែច្រើនថែមទៀតផងដែរ៕