នាយករដ្ឋមន្ត្រី ហ៊ុន ម៉ាណែត លើកទឹកចិត្តឱ្យថ្នាក់នាំជានាយទាហាន ពង្រឹងការធ្វើការទូតយោធា ជាមួយបណ្ដាប្រទេសនានា ដើម្បីបញ្ជៀសជម្លោះប្រដាប់អាវុធ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងលើកទឹកចិត្តឱ្យថ្នាក់នាំ ជានាយទាហានពង្រឹងការធ្វើការទូតយោធាជាមួយបណ្ដាប្រទេសនានា ស្វែងយល់ពីការប្រែប្រួលសភាពការណ៍តំបន់ ដើម្បីបញ្ជៀសជម្លោះប្រដាប់អាវុធ ដែលអាចកើតឡើងដោយសារការខ្វះការទំនាក់ទំនងល្អ។

ក្នុងឱកាសអញ្ជើញជាអធិបតី“ សម្ពោធអគារសហសិក្សា អគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នៅសាកលវិទ្យាល័យការពារជាតិ ”នាថ្ងៃទី១៩ មេសា ២០២៤នេះ សម្តេចធិបតីនាយករដ្ឋមន្ត្រី បានមានប្រសាសន៍ថា នាយទាហានត្រូវមានការយល់ដឹងឱ្យបានទូលំទូលាយ ទាំងបច្ចេកទេស ទាំងភូមិសាស្ត្រនយោបាយពិភពលោក។ កងយោធពលខេមរភូមិន្ទ ដើរតួនាទីស្នូលយ៉ាងសំខាន់ ក្នុងកិច្ចសហការជាមួយបណ្ដាប្រទេសជិតខាង ដើម្បីទប់ស្កាត់ និងបង្រ្កាបឧក្រិដ្ឋកម្មឆ្លងដែនបានយ៉ាងមានប្រសិទ្ធភាព។

សម្ដេចធិបតី បានស្នើឱ្យសាកលវិទ្យាល័យការពារជាតិ បណ្តុះបណ្ដាយនាយទាហានឱ្យមានប្រសិទ្ធភាព ព្រោះស្នូលនៃការពារជាតិគឺធនធានមនុស្ស ដើម្បីធានាដល់កិច្ចការពារ និងការថែរក្សាសន្តិសុខជាតិ ៕