ឯកឧត្តមរដ្ឋមន្ត្រី ហេង សួរ៖ ចាប់ពីឆ្នាំ២០២៥ តទៅ ក្រសួងការងារ នឹងកំណត់យកទិវាពលកម្មអន្តរជាតិ ១ ឧសភា ជាថ្ងៃប្រគល់ពានដល់សហគ្រាសដែលទទួលបានជ័យលាភី
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ បានថ្លែងថា ចាប់ពីឆ្នាំ២០២៥ តទៅ ក្រសួងការងារ និងបណ្តុះបណ្តាលវិជ្ជាជីវៈ នឹងកំណត់យកទិវាពលកម្មអន្តរជាតិ ១ ឧសភា ជាថ្ងៃប្រគល់ពានដល់សហគ្រាសដែលទទួលបានជ័យលាភី។
ការថ្លែងរបស់ឯកឧត្តមរដ្ឋមន្ត្រី ហេង សួរ ក្នុងពិធីសំណេះសំណាលជាមួយសហជីព សេដ្ឋកិច្ចក្រៅប្រព័ន្ធ និងសមាគម បុគ្គលិកសិក្សា ដើម្បីអបអរសាទរខួបអនុស្សាវរីយ៍ លើកទី១៣៨នៃទិវាពលកម្មអន្ដរជាតិ ១ ឧសភា ឆ្នាំ២០២៤ នៅមណ្ឌលសន្និបាត និងពិព័រណ៍អន្តរជាតិជ្រោយចង្វារ (OCIC) នាព្រឹកថ្ងៃទី២៨ ខែមេសា ឆ្នាំ២០២៤។
ឯកឧត្តមរដ្ឋមន្ត្រី ហេង សួរ បានបញ្ជាក់ថា សហគ្រាសជ័យលាភី ត្រូវទទួលបានការលើកទឹកចិត្ត មានជាអាទិ៍៖ ១. ពានរង្វាន់ “សហគ្រាសមួយជាសហគមន៍សុខសាន្តមួយ” ដែលមាន ៣កម្រិត, ២. វិញ្ញាបនបត្រ”សហគ្រាសមួយជាសហគមន៍សុខសាន្តមួយ” និង៣. ការលើកលែងការចុះអធិការកិច្ចសាមញ្ញក្នុងរយៈពេលចាប់ពី ១ឆ្នាំ ដល់ ៣ឆ្នាំ ស្របតាមកម្រិតនៃពានរង្វាន់ដែលទទួលបាន។
ឯកឧត្តមរដ្ឋមន្ត្រី បានថ្លែងថា ក្រសួងខិតខំធ្វើឱ្យប្រសើរឡើងនៅក្នុងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ស្របតាមកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧នៃរដ្ឋសភា។
យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជាក្នុងត្រីមាសទី១ ឆ្នាំ២០២៤ នេះបានអនុម័តគម្រោងវិនិយោគថ្មី និងគម្រោងវិនិយោគពង្រីកចំនួន ១០៦គម្រោង ដែលមានទុនវិនិយោគសរុបចំនួន ២,២ពាន់លានដុល្លារអាម៉េរិក និងអាចបង្កើតការងារថ្មីចំនួនប្រមាណជា១០,៧ម៉ឺនកន្លែង។ ជាក់ស្ដែង គិតត្រឹមខែមីនា ឆ្នាំ២០២៤ នេះ ចំនួនសហគ្រាស ដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈ បានកើនឡើងពីចំនួន ៤០,៩៧៥ ដល់ចំនួន ៤៣,៨៤៩សហគ្រាស (កើនឡើងចំនួន ២,៨៧៤សហគ្រាស) ហើយចំនួនកម្មករនិយោជិតបានកើនឡើងពីចំនួន១ ៧១៥,០២៩នាក់ ដល់ចំនួន ១,៧៩៣,៤៦៧នាក់ (កើនឡើងចំនួន ៧៨,៤៣៨នាក់)។
ទន្ទឹមគ្នានេះ ក្រសួងការងារ និងបណ្ដុះបណ្តាលវិជ្ជាជីវៈ បានខិតខំប្រឹងប្រែងផ្តល់សេវាស្វែងរកការងារ តាមរយៈទីភ្នាក់ងារជាតិមុខរបរ និងការងារ (NEA) ដើម្បីជួយស្វែងរកការងារធ្វើជូនប្រជាពលរដ្ឋដោយបានចុះឈ្មោះអ្នកស្វែងរកការងារនិងផ្គូផ្គងបញ្ជូនអ្នកស្វែងរកការងារទៅឱ្យនិយោជក។
ក្រសួងការងារ និងបណ្ដុះបណ្តាលវិជ្ជាជីវៈ បានបន្តការធ្វើសមាហរណកម្ម និងទំនើបកម្មការធ្វើអធិការកិច្ចការងារ ពង្រឹងគុណភាព និងប្រសិទ្ធភាពអធិការកិច្ចការងារ ផ្អែកលើកម្រិតហានិភ័យរបស់សហគ្រាស គ្រឹះស្ថាននីមួយៗ និងវិធីសាស្ត្រអធិការកិច្ចប្រកបដោយវិជ្ជាជីវៈ និងចុះអធិការកិច្ចការងារតែ ១ដង/ឆ្នាំ ចំពោះអធិការកិច្ចសាមញ្ញ ត្រូវអនុវត្តតាមរបបស្វ័យប្រកាសអធិការកិច្ចការងារតាមប្រព័ន្ធស្វ័យប្រវត្តិកម្ម។
សិទ្ធិសេរីភាពអង្គការវិជ្ជាជីវៈក៏ត្រូវបានលើកកម្ពស់ ដែលគិតត្រឹមខែមីនា ឆ្នាំ២០២៤ អង្គការវិជ្ជាជីវៈបានចុះបញ្ចិកាសរុបកើនដល់ ៦,៣១៧ ក្នុងនោះ សហភាពសហជីពមានចំនួន ៤២, សហព័ន្ធសហជីពមានចំនួន ២៨០, សហជីពមូលដ្ឋានមានចំនួន ៥,៩៨៣, និងសមាគមនិយោជកមានចំនួន ១២។
ជាមួយគ្នានេះ យន្តការនៃការផ្សះផ្សាវិវាទការងារ ក៏ត្រូវបានពង្រឹងទាំងសមត្ថភាព គុណភាពផ្សះផ្សាដោះស្រាយក្រៅប្រព័ន្ធតុលាការ ឱ្យកាន់តែមានប្រសិទ្ធភាពនិងមានភាពល្អប្រសើរជាងមុន ដោយសារភាពចាស់ទុំនៃតួអង្គពាក់ព័ន្ធ។ ជាក់ស្ដែង ក្នុងត្រីមាសទី១ នេះ អត្រាសះជានៃការផ្សះផ្សាវិវាទការងារនៅកម្រិតក្រសួងមានអត្រាខ្ពស់ប្រមាណ ៨៤% ធៀបនឹងរយៈពេលដូចគ្នាក្នុងឆ្នាំ២០២៣ដែលមានត្រឹមតែ ៧៦% ប៉ុណ្ណោះ។
ក្រសួងការងារ និងបណ្ដុះបណ្តាលវិជ្ជាជីវៈ ក៏បានផ្តោតការយកចិត្តទុកដាក់ខ្ពស់ លើការទប់ស្កាត់ការប្រើប្រាស់ទម្រង់ធ្ងន់ធ្ងរបំផុតនៃពលកម្មកុមារ និងការងារដោយបង្ខំដោយបានចុះផ្សព្វផ្សាយទប់ស្កាត់ការប្រើប្រាស់ពលកម្មកុមារ និងចុះធ្វើអធិការកិច្ច ដាក់កំហិត និងផាកពិន័យ ព្រមទាំងព្រមានចាត់វិធានការតឹងរ៉ឹងតាមផ្លូវច្បាប់ចំពោះម្ចាស់សហគ្រាស គ្រឹះស្ថាន សិប្បកម្មឡឥដ្ឋ និងកសិឧស្សាហកម្មទាំងឡាយណាដែលមិនអនុវត្តបានត្រឹមត្រូវតាមច្បាប់ និងលិខិតបទដ្ឋានគតិយុត្តដែលអនុញ្ញាតឱ្យប្រើប្រាស់ពលកម្មកុមារ។
បើតាម ឯកឧត្តមរដ្ឋមន្ត្រី ហេង សួរ សង្កេតឃើញថា បងប្អូនកម្មករនិយោជិតមានការសាទរយ៉ាងខ្លាំងចំពោះចំណាត់ការរបស់ក្រសួង ក្នុងការដាក់ចេញវិធានការបង្ការទប់ស្កាត់បានទាន់ពេលវេលា នូវរាល់បញ្ជដែលអាចកើតឡើងជាយថាហេតុនិងដំណោះស្រាយរាល់បាតុភាពនានាប្រកបដោយបុរសកម្ម ក៏ដូចជាការដោះស្រាយវិវាទការងារ ករណីរោងចក្រក្ស័យធនដោយថៅកែរត់ចោល ឬដោយអគ្គិភ័យឆេះរោងចក្រជាដើម ព្រមជាមួយនឹងការផ្តល់សេវាសាធារណៈ ប្រកបដោយគុណភាព និងទាន់ពេលវេលា ៕
