ឯកឧត្តមបណ្ឌិត ហេង សុផាន់ណារិទ្ធ ដឹកនាំកិច្ចប្រជុំគណៈកម្មការបច្ចេកទេស នៃប.ស.ស. ដើម្បីពិនិត្យសេចក្តីព្រាងរបាយការណ៍វាយតម្លៃហានិភ័យហិរញ្ញវត្ថុរបបសន្តិសុខសង្គម
ភ្នំពេញ៖ នៅព្រឹកថ្ងៃទី ២៩ ខែមេសា ឆ្នាំ២០២៤ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការបច្ចេកទេសសម្រាប់ការវាយតម្លៃហានិភ័យហិរញ្ញវត្ថុរបបសន្តិសុខសង្គម បានដឹកនាំកិច្ចប្រជុំគណៈកម្មការ ដើម្បីពិនិត្យ ពិភាក្សា និងផ្តល់ធាតុចូលលើសេចក្តីព្រាងរបាយការណ៍វាយតម្លៃហានិភ័យហិរញ្ញវត្ថុរបបសន្តិសុខសង្គម រៀបចំដោយជំនាញការអង្គការអន្ដរជាតិខាងការងារ (ILO) ដែលមានអ្នកចូលរួមសរុបប្រមាណជា ២០រូប។
តាមរយៈលទ្ធផលនៃសេចក្ដីព្រាងរបាយការណ៍វាយតម្លៃរបស់អ្នកជំនាញការអង្គការអន្តរជាតិខាងការងារ (ILO) អង្គប្រជុំបានពិភាក្សាយ៉ាងហ្មត់ចត់ដោយផ្អែកលើលក្ខណៈបច្ចេកទេស ក៏ដូចជាបរិបទនៃការអនុវត្តការងារ ជាពិសេសឈរលើគោលនយោបាយរបស់រាជរដ្ឋាភិបាល បានផ្ដល់ជាធាតុចូលសំខាន់ៗយ៉ាងស៊ីជម្រៅ ធ្វើយ៉ាងណាធានាឱ្យបាននូវនិរន្ដរភាពហិរញ្ញវត្ថុរបបសន្ដិសុខសង្គម សំដៅឆ្ពោះទៅរកប្រសិទ្ធភាព តម្លាភាព និងគណនេយ្យភាពនៃការអនុវត្តរបបសន្ដិសុខសង្គមនៅកម្ពុជា។
បន្ទាប់ពីបានពិភាក្សារួចពេញមួយព្រឹកនេះ អង្គប្រជុំបានពិនិត្យសម្រេចជារួមលើលទ្ធផលមួយចំនួននៃសេចក្ដីព្រាងរបាយការណ៍វាយតម្លៃរបស់ជំនាញការអង្គការ ILO ដែលមានភាពត្រឹមត្រូវ គ្រប់ជ្រុងជ្រោយ ប្រកបដោយការយកចិត្តទុកដាក់ខ្ពស់។
ដោយឡែកនៅចំណុចមួយចំនួនទៀត ឯកឧត្តមបណ្ឌិតប្រធានអង្គប្រជុំ បានកំណត់ពិភាក្សាបន្តទៀត ជាមួយក្រុមការងារបច្ចេកទេស និងស្នើសុំគោលការណ៍ពីថ្នាក់ដឹកនាំអង្គភាព ដើម្បីពិនិត្យ និងសម្រេចបន្ថែមទៀត ធ្វើយ៉ាងណាឱ្យសេចក្តីព្រាងរបាយការណ៍វាយតម្លៃហានិភ័យហិរញ្ញវត្ថុរបបសន្តិសុខសង្គម ដែលរៀបចំឡើងដោយជំនាញការអង្គការ ILO ប្រកបដោយសុក្រឹត្យភាព ៕
