ប្រធានក្រុមប្រឹក្សាខេត្តក្រចេះ ណែនាំដល់អាជ្ញាធរឃុំ កម្លាំងប្រជាការពារ ត្រូវចុះពិនិត្យស្រាវជ្រាវកំណត់មុខសញ្ញាក្រុមប្រព្រឹត្តបទល្មើសនេសាទ ដើម្បីចាត់វិធានការការពារ
ភ្នំពេញ៖ នាថ្ងៃចន្ទ ១៣រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៦ ខែឧសភា ឆ្នាំ២០២៤ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ បានអញ្ជើញដឹកក្រុមការងារខេត្ត ស្រុក-ឃុំ ចុះពិនិត្យប្រព័ន្ធអាងស្តុបទឹកនៅតាមទំនប់ធំៗ ចំនួន០៣ទីតាំង នៅក្នុងស្រុកចិត្របុរី ដើម្បីធានាឱ្យបានដល់ការបម្រើផលប្រយោជន៍ដល់ប្រជាសហគមន៍ ក្នុងការប្រើប្រាស់ទឹកស្អាតប្រចាំថ្ងៃ ការធ្វើកសិកម្ម និងចិញ្ចឹមសត្វជាដើម និងណែនាំដល់សហគមន៍ អំពីការការពារថែរក្សាទឹកឱ្យបានល្អ ដើម្បីទុកប្រើប្រាស់ជាប្រយោជន៍សាធារណៈឱ្យបានគ្រប់គ្រាន់រហូតដល់រដូវវស្សាចូលមកដល់ខាងមុខនេះ។
ដំណើរការនេះបានចុះពិនិត្យទៅលើ៖
១)-អាងទឹកទំនប់ស្វាយជ្រុំ ស្ថិតនៅឃុំថ្មី ដែលស្រោចស្រពស្រែប្រាំងចំនួន ០៣ឃុំ សរុបចំនួន២៥០ហិកតា និងសម្រាប់ផលិតទឹកស្អាតផ្គត់ផ្គង់ដល់ប្រជាពលរដ្ឋប្រើប្រាស់ប្រចាំថ្ងៃ ចំនួន៥ឃុំ។
២)-អាងទឹកទំនប់អូរស្នែងខ្លេរ ស្ថិតនៅក្នុងឃុំថ្មី ដែលផ្គត់ផ្គង់ស្រោចស្រពលើដីចម្ការចំនួន៣០ហិកតា សម្រាប់គម្រោងដីសម្បទានសង្គមកិច្ច Lased2។
៣)-អាងទឹកទំនប់កោះសុក្រំ ស្ថិតនៅឃុំដារ ដែលស្រោចស្រពស្រូវប្រាំង ចំនួន៥០០ហិកតា។
ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានបញ្ជាក់ឲ្យដឹងថា ជាលទ្ធផលអាងទឹកទំនប់ទាំង៣ខាងលើនេះ ឃើញថាកម្រិតទឹកមានការកើនឡើង និងវាយតម្លៃបានថាប្រភពទឹកអាចធានាបានដល់ការប្រើប្រាស់ផ្គត់ផ្គង់គ្រប់គ្រាន់ដល់ប្រជាសហគមន៍ទាំងការទទួលបានទឹកស្អាតប្រើប្រាស់ ការធ្វើកសិកម្ម និងការចិញ្ចឹមសត្វជាដើម មុននឹងរដូវវស្សាចូលមកដល់។ ហើយតាមគោលការណ៍របស់រដ្ឋបាលខេត្ត គឺធ្វើយ៉ាងណាឱ្យប្រជាពលរដ្ឋមានទឹកស្អាតប្រើប្រាស់បានគ្រប់ៗគ្នា និងពង្រីកប្រព័ន្ធប្រើប្រាស់ទឹកស្អាតឱ្យបានគ្រប់ភូមិនៅជនបទ។
ក្នុងនោះដែរ ឯកឧត្តមប្រធានក្រុមប្រឹក្សាខេត្ត ក៏បានជម្រុញណែនាំដល់អាជ្ញាធរឃុំ កម្លាំងប្រជាការពារ និងប្រជាសហគមន៍ ត្រូវចុះពិនិត្យតាមដានជាប់ជាប្រចាំ និងស្រាវជ្រាវកំណត់មុខសញ្ញាក្រុមប្រព្រឹត្តបទល្មើសនេសាទ ដើម្បីចាត់វិធានការការពារនូវការផ្តល់ប្រយោជន៍រួមនៅក្នុងសហគមន៍ ទាំងត្រី និងទឹកដែលជាប្រភពកែច្នៃជាទឹកស្អាត និងសូមឲ្យចូលរួមថែរក្សាការពារនូវសមិទ្ធផលដែលមាន បន្តដាំដើមឈើតាមទំនប់ដើម្បីជួយទប់ពីការបាក់ដីជាដើម ៕
