ឧបនាយករដ្ឋមន្ត្រី កើត រិទ្ធ អនុញ្ញាតឱ្យប្រធានអង្គភាពស៊ើបការណ៍ហិរញ្ញវត្ថុកម្ពុជា ចូលជួបសម្តែងការគួរសម
ភ្នំពេញ៖ នៅទីស្តីការក្រសួងយុត្តិធម៌ នាព្រឹកថ្ងៃទី៧ ខែឧសភា ឆ្នាំ២០២៤ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ បានអនុញ្ញាតឱ្យ ឯកឧត្តម ហេង បូមករា ដែលទើបទទួលការតែងតាំងជាប្រធានអង្គភាពស៊ើបការណ៍ហិរញ្ញវត្ថុ នាពេលថ្មីៗកន្លងទៅនេះ ដើម្បីចូលជួបសម្តែងការគួរសម និងទទួលអនុសាសន៍ដឹកនាំដ៏ខ្ពង់ខ្ពស់ពាក់ព័ន្ធនឹងការងារប្រឆាំងការសម្អាតប្រាក់, ហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យនៅកម្ពុជា។
ថ្លែងក្នុងជំនួបនេះ ឯកឧត្តមឧបនាយករដ្ឋមន្ត្រី ប្រធាន គ.ស.ហ. បានរំលឹកអំពីបេសកកម្មក្នុងការដកកម្ពុជាចេញពីបញ្ជីប្រផេះនាពេលកន្លងមក ព្រមទាំងសារៈសំខាន់នៃការងារប្រឆាំងការសម្អាតប្រាក់ និងទិសដៅការងារដែលអង្គភាពស៊ើបការណ៍ហិរញ្ញវត្ថុកម្ពុជាត្រូវគិតគូរ និងអនុវត្ត ដើម្បីពង្រឹងជំនឿទុកចិត្តលើប្រព័ន្ធហិរញ្ញវត្ថុរបស់កម្ពុជា៕
