សម្ដេចតេជោ ហ៊ុន សែន៖ បើយោងទៅលើការសិក្សា ព្រះបាទអង្គឌួង បានគិតអំពីគម្រោងព្រែកជីកហ្វូណនតេជោនេះ តាំងពីឆ្នាំ១៨៤០

ភ្នំពេញ៖ ក្នុងអញ្ជើញថ្លែងសារពិសេសស្តីពី «ព្រែកជីកហ្វូណនតេជោ» នាថ្ងៃទី១៦ ខែឧសភា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានរំលឹកថា បើយោងទៅលើការសិក្សា ព្រះបាទអង្គឌួង ព្រះអង្គបានគិតអំពីបញ្ហានេះតាំងពីឆ្នាំ១៨៤០ រួចមកហើយ ឬក្រោយនេះបន្ដិច ដែលមានផ្លូវ៤១ តភ្ជាប់ផ្លូវ៥១ ដែលគេហៅថាផ្លូវព្រះបាទអង្គឌួង។

សម្ដេចតេជោបញ្ជាក់ថា «ព្រះអង្គបានគិតរឿងនេះមិនមែនមិនគិតទេ ក៏ប៉ុន្ដែយើងមានលទ្ធភាពធ្វើឯណា។ ហើយសួរថាកន្លងប៉ុន្មានឆ្នាំនេះហេតុអីមិនធ្វើ? កម្ពុជាក្រណាស់ រកតែបាយស៊ីមិនគ្រប់ផង»។

សម្ដេចតេជោ ហ៊ុន សែន បានសម្ដែងការសោកស្ដាយចំពោះក្រុមអ្នកវិភាគប្រឆាំងជ្រុលនិយមមួយក្ដាប់តូចនោះ ដែលនៅតែបន្តយករឿងព្រែកជីកហ្វូណនមកភ្ជាប់នូវបញ្ហានយោបាយតំបន់ប្រឆាំងចិន។ សម្ដេចសម្ដែងការសោកស្ដាយ ដែលក្នុងនាមជាបញ្ញវន្តមួយរូប ប៉ុន្ដែក្រុមអ្នកវិភាគប្រឆាំងមួយចំនួនតូច បែរជាបន្តយករឿងដែលជាសមិទ្ធផលសម្រាប់ការអភិវឌ្ឍសង្គម និងសេដ្ឋកិច្ចជាតិមកធ្វើជាឈ្នាន់នយោបាយរបស់ពួកគេ។ សម្ដេចតេជោ ហ៊ុន សែន មានប្រសាសន៍ផ្ដាំផ្ញើទៅប្រជាពលរដ្ឋ សូមចាប់អារម្មណ៍​លើឯករាជ្យភាពខាងនយោបាយលើការដឹកជញ្ជូនរបស់កម្ពុជា ៕