ឯកឧត្តមកិត្តិសេដ្ឋាបណ្ឌិត ជាម យៀប ស្នើឱ្យមេការ និងកម្មករធ្វើផ្លូវយកចិត្តទុកដាក់ក្នុងការធ្វើផ្លូវឱ្យមានគុណភាព ធានាបានស្តង់ដារឹងមាំយូរអង្វែង

ភ្នំពេញ៖ ក្នុងឱកាសអញ្ជើញពិនិត្យមើលវឌ្ឍនភាពការសាងសង់ផ្លូវបេតុងអាមេ១ខ្សែប្រវែងជាងពីរពាន់ម៉ែត្រ ស្ថិតនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង នាព្រឹកថ្ងៃទី១៩ ខែឧសភា ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា បានស្នើសុំឱ្យមេការ និងកម្មករធ្វើផ្លូវ យកចិត្តទុកដាក់ខ្ពស់ក្នុងការធ្វើផ្លូវឱ្យមានគុណភាពល្អ ធានាបានស្តង់ដារឹងមាំក្នុងការប្រើប្រាស់បានយូរអង្វែង។

ឯកឧត្តមកិត្តិសេដ្ឋាបណ្ឌិត ជាម យៀប ក៏បានជំរុញឱ្យក្រុមជាង ក៏ដូចជាកម្មករធ្វើផ្លូវទាំងអស់ ត្រូវខិតខំធ្វើយ៉ាងណាពន្លឿនការងារក្នុងការធ្វើផ្លូវនេះឱ្យបានចប់សព្វគ្រប់ជាស្ថាពរ នៅមុនពេលរដូវវស្សាចូលមកដល់ ឆាប់ៗនេះ។

សូមជម្រាបថា ផ្លូវបេតុងអាមេដែលមានប្រវែង២,១០០ម៉ែត្រ ចាប់ពីខ្លោងទ្វារវត្តពោសិរីអណ្តែត ហៅវត្តព្រែកចាម រហូតដល់ភូមិព្រែកចាម បានប្រារព្ធពិធីបើកការដ្ឋានសាងសង់កាលពីថ្ងៃទី៨ ខែមីនា ឆ្នាំ២០២៤ រហូតមកទល់ពេលនេះកសាងបានប្រមាណ៥០%ហើយ។ ផ្លូវបេតុងអាមេនេះ ជាគំនិតផ្តួចផ្តើមសាងសង់ដោយ នឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវសិរីចរណវិសុទ្ធិអគ្គមហាឧបាសិកាពុទ្ធសាសនូបត្ថម្ភក៍ ហាក់ ជូ រួមជាមួយសប្បុរសជននានា សម្រាប់បម្រើប្រយោជន៍សាធារណៈ ពិសេសជូនដល់ប្រជាពលរដ្ឋនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង ដើម្បីមានភាពងាយស្រួលក្នុងការធ្វើដំណើរ ក៏ដូចជាការដឹកជញ្ជូនកសិផល និងទំនិញផ្សេងៗ៕