កាកបាទក្រហមកម្ពុជា ផ្ដល់អំណោយជូនដល់គ្រួសារលោក ចន ធី អាយុ ប្រជាការពារ រស់នៅស្រុកព្រៃឈរ ដែលមានកូនសុទ្ធតែមានពិការភាពក្រិះក្រិន

ភ្នំពេញ៖ នៅថ្ងៃអាទិត្យ ទី១៩ ខែឧសភា ឆ្នាំ២០២៤ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី រួមជាមួយអនុសាខាកាកបាទក្រហមកម្ពុជា ស្រុកព្រៃឈរ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ជួយសម្រាលការលំបាកជូនដល់គ្រួសារលោក ចន ធី អាយុ ៥៨ឆ្នាំ ប្រជាការពារ រស់នៅភូមិតារាម ឃុំជ្រៃវៀន ស្រុកព្រៃឈរ ខេត្តកំពង់ចាម ដែលមានកូនសុទ្ធតែមានពិការភាពក្រិះក្រិនដោយសារកត្តាហ្សែនឪពុកម្តាយ។

លោក ចន ធី បានរៀបការជាមួយភរិយាឈ្មោះ សួស សុខុន អាយុ ៥៥ឆ្នាំ ដែលត្រូវជាបងប្អូនជីដូនមួយនឹងគ្នា បានបង្កើតកូនចំនួន ៥នាក់ សុទ្ធតែមានពិការភាពក្រិះក្រិនទាំងអស់ (ស្លាប់ ២នាក់) ដែលបច្ចុប្បន្ននេះ កូនស្រីទី១ អាយុ ២០ឆ្នាំ, កូនប្រុសទី២ អាយុ ១៧ឆ្នាំ និងកូនស្រីទី៣ អាយុ ៩ឆ្នាំ។

ក្នុងឱកាសចុះសួរសុខទុក្ខនោះ លោកជំទាវ អគ្គលេខាធិការរងទី១ បានពាំនាំប្រសាសន៍ផ្តាំផ្ញើសួរសុខទុក្ខ ក្តីអាណិតអាសូរពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសូមផ្តាំផ្ញើថែទាំសុខភាពឱ្យបានល្អ រស់នៅមានអនាម័យ ពិសាទឹកដាំឆ្អិន ដើម្បីជៀសផុតពីជំងឺនានា និងកាត់បន្ថយការចំណាយក្នុងគ្រួសារ។

ទន្ទឹមនឹងនេះ លោកជំទាវ ក៏បានអំពាវនាវដល់បងប្អូននៅក្នុងភូមិសូមកុំមានការរើសអើងចំពោះគ្រួសារខាងលើនេះ ហើយចាត់ទុកថា នេះគឺជាមេរៀនមួយដែលប្រជាជនយើងត្រូវយកចិត្តទុកដាក់ គិតគូរពីការកសាងផែនការគ្រួសារឱ្យបានត្រឹមត្រូវ ដោយត្រូវពិនិត្យសុខភាព ពិនិត្យឈាម ពិនិត្យហ្សែន របស់ដៃគូទាំងសងខាង មុននឹងឈានដល់ការរៀបការ ដើម្បីជៀសផុតពីជំងឺនានា ឬករណីដូចខាងលើនេះ ព្រោះថានេះមិនត្រឹមតែជាបន្ទុករបស់គ្រួសារនោះទេ ប៉ុន្តែក៏ជាបន្ទុករបស់រាជរដ្ឋាភិបាល របស់សង្គមជាតិយើងផងដែរ។

សូមបញ្ជាក់ថា អំណោយកាកបាទក្រហមកម្ពុជា ផ្តល់ជូនគ្រួសារខាងលើរួមមាន៖ អង្ករ មី ត្រីខ ទឹកត្រី ទឹកស៊ីអ៊ីវ ទឹកបរិសុទ្ធ និងថវិកាមួយចំនួន៕