លោកជំទាវ គឹម សេដ្ឋានី ដឹកនាំកិច្ចប្រជុំមួយជាមួយគណៈប្រតិភូពាក់ព័ន្ធ ដើម្បីត្រៀមលក្ខណៈចូលរួមសន្និសីទថ្នាក់តំបន់ ស្តីពី “សារះសំខាន់នៃការវិនិយោគលើការអភិវឌ្ឍកុមារតូច”
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា នៅថ្ងៃទី២០ ខែឧសភា ឆ្នាំ២០២៤ បានដឹកនាំកិច្ចប្រជុំជាមួយគណៈប្រតិភូពាក់ព័ន្ធ ដើម្បីត្រៀមលក្ខណៈចូលរួមសន្និសីទថ្នាក់តំបន់ ស្តីពី “សារះសំខាន់នៃការវិនិយោគលើការអភិវឌ្ឍកុមារតូច” (INVESTING IN ECD) ដែលគ្រោងរៀបចំពីថ្ងៃទី២៧-៣១ ខែឧសភា ឆ្នាំ២០២៤ នៅ ទីក្រុងប៉េណាំង ប្រទេស ម៉ាឡេស៊ី។
ការចូលរួមសន្និសីទថ្នាក់តំបន់ប្រចាំឆ្នាំ២០២៤ នេះ បានឆ្លុះបញ្ចាំងពីគំរូថ្មីមួយ និងភាពជាអ្នកដឹកនាំរបស់ក្រសួងអប់រំ យុវជន និងកីឡា ដែលបានសម្របសម្រួលឱ្យមានការចូលរួមពីសំណាក់មន្ត្រីជំនាញនាយកដ្ឋានពាក់ព័ន្ធនៃក្រសួងអប់រំ យុវជន និងកីឡា តំណាងដៃគូអភិវឌ្ឍន៍ពាក់ព័ន្ធ និងតំណាងវិស័យឯកជន សរុបចំនួន ២៤នាក់។
តាមរយៈព្រឹត្តិការណ៍ដ៏មានសារៈសំខាន់នេះ អ្នករៀបចំកម្មវិធីបានផ្តល់ស្តង់តាំងពិព័រណ៍មួយកន្លែងសម្រាប់កម្ពុជាដាក់តាំងបង្ហាញពីសមិទ្ធផលដែលយើងបានសហការអភិវឌ្ឍរួមគ្នាសម្រាប់ការគាំពារ និងអភិវឌ្ឍកុមារតូច និងមានតំណាងប្រតិភូយើងចូលរួមជាវាគ្មិនតាមប្រធានបទមួយចំនួនពាក់ព័ន្ធ៖ ១) ការអនុវត្តការងារគាំពារ និងអភិវឌ្ឍកុមារតូចបែបពហុវិស័យ ២) ការអនុវត្កញ្ចប់អប់រំមាតាបិតាសម្រាប់ការគាំពារ និងអភិវឌ្ឍកុមារតូច និង៣)តួនាទីរបស់ភ្នាក់ងារសុខភាពក្នុងសហគមន៍ក្នុងការជួយកុមារតូចមានការអភិវឌ្ឍយឺតយ៉ាវ។
ក្នុងឱកាសនោះលោកជំទាវ បានផ្លែងអំណរគុណចំពោះដៃគូអភិវឌ្ឍពាក់ព័ន្ធក្នុងការរួមចំណែកលើកកម្ពស់ការងារគាំពារ និងអភិវឌ្ឍកុមារតូច និងបានណែនាំគណៈប្រតិភូ ត្រូវត្រៀមកញ្ចប់សម្ភារះ និងឯកសារចាំបាច់ពាក់ព័ន្ធ ដើម្បីបានដាក់តាំងបង្ហាញនិងចែករំលែកដល់អ្នកចូលរួមដែលឆ្លុះបញ្ចាំងពីកិច្ចខិតខំប្រឹងប្រែងរួមគ្នាសម្រាប់ការពាំពារ និងអភិវឌ្ឍកុមារតូចនៅកម្ពុជា៕
