សម្តេចតេជោ ស្នើឲ្យមានច្បាប់ដាក់ទោសចំពោះអ្នកដែលនិយាយថា គ្មានរបប ប៉ុល ពត

ភ្នំពេញ៖ ប្រធានព្រឹទ្ធសភានៃកម្ពុជា និងជាអតីតនាយករដ្ឋមន្រ្តីនៃកម្ពុជា សម្តេចតេជោ ហ៊ុន សែន បានផ្តល់ជាទស្សន និងលើកទឹកចិត្តដល់អ្នកតាក់តែងច្បាប់ គួរដាក់ទោសកម្រិតណាមួយចំពោះបុគ្គលណាដែល និយាយថាគ្មានរបបកម្ពុជាប្រជាធិបតេយ្យ (ប៉ុល ពត)។

សម្ដេចតេជោបានលើកឡើងបែបនេះ ក្នុងឱកាសអញ្ជើញចូលរួមពិធីបិទសន្និសីទស្តីពី «អនាគតកម្ពុជាគ្មានអំពើប្រល័យពូជសាសន៍» នៅបញ្ជាការដ្ឋានកងទព័ជើងគោក នាថ្ងៃទី២២ ខែឧសភា ឆ្នាំ២០២៤នេះ។

សម្តេចតេជោ ហ៊ុន សែន លើកឡើងថា វាអយុត្តិធម៌ខ្លាំងណាស់សម្រាប់ប្រជាពលខ្មែរទាំងមូលដែលជាជនរងគ្រោះដោយសារតែ របបប្រល័យពូជសាសន៍ប៉ុល ពត ហើយបែជាជនអគតិមួយក្តាប់តូចមិនទទួលស្គាល់របបនេះ ដូច្នេះគប្បី ដាក់ច្បាប់មួយដាក់ទោសចំពោះអ្នកទាំងនោះ។

សម្តេចតេជោបានបញ្ជាក់ថា របបកម្ពុជាប្រជាធិបតេយ្យ ប៉ុល ពត គឺបានកើតឡើងលើទឹកដីរបស់កម្ពុជាពិតប្រាកដមែន ពុំមែនជាការភួតកុហកដើម្បីតែគេងចំណេញនយោបាយនោះឡើយ ខណៈរបបដ៏ឃោរឃៅមួយនេះមិនមែនត្រឹមតែមេរៀនសម្រាប់កម្ពុជាប៉ុណ្ណោះទេ វាថែមទាំងជាមេរៀនសម្រាប់ពិភពលោកទាំងមូលផងដែរ។

សម្តេចបានលើកឡើងទៀតថា អ្វីដែលធ្វើឲ្យសម្តេច និងប្រជាជនកម្ពុជាកាន់តែឈឺចាប់បន្ថែមទៀតនោះ គឺអន្តរជាតិមិនត្រឹមតែមិនដាក់ទោសខ្មែរក្រហមប៉ុណ្ណោះទេ ពួកគេ ថែមទាំងជួយបង្កើតរដ្ឋាភិបាលចម្រុះឲ្យខ្មែរក្រហម និងថែមទាំងបោះឆ្នោះឲ្យរបបកម្ពុជាប្រជាធិបតេយ្យ មានកៅអីនៅអង្គការសហប្រជាជាតិថែមទៀតផង៕