ឯកឧត្ដម សក់ សេដ្ឋា៖ ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ជាដំណើការបោះឆ្នោត ដ៏មានសារសំខាន់ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យសេរីពហុបក្ស

ភ្នំពេញ៖ ឯកឧត្ដម សក់ សេដ្ឋា សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកបវេល បានលើកឡើងថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺជាដំណើការបោះឆ្នោត ដ៏មានសារសំខាន់ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យសេរីពហុបក្ស ។

ក្នុងឱកាសអញ្ជើញបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តទី៤ ក្នុងស្រុកបវេល ខេត្តបាត់ដំបង
នៅទីស្នាក់ការគណបក្សស្រុកបវេល នាថ្ងៃទី២៤ ខែឧសភា ឆ្នាំ២០២៤ ឯកឧត្ដម សក់ សេដ្ឋា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺជាដំណើការបោះឆ្នោត ដ៏មានសារសំខាន់ ដើម្បីបន្តជំរុញ ដំណើរការនៃកំណែទម្រង់អភិបាលកិច្ចនៅថ្នាក់ក្រោមជាតិ ស្របតាមគោលនយោបាយវិមជ្ឈការ និងវិសហមជ្ឈការ សំដៅពង្រឹងរដ្ឋបាលថ្នាក់ក្រោមជាតិឱ្យក្លាយជារដ្ឋបាលដ៏រឹងមាំប្រកបដោយ សក្តានុពល ដើម្បីលើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបសេចក្តី ត្រូវការរបស់ប្រជាពលរដ្ឋគ្រប់ៗរូបក្នុងសង្គម។

ព្រមជាមួយនេះ ឯកឧត្ដម ប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកបវេល ក៏បានសម្តែងនូវការកោតសរសើរ និងវាយតម្លៃខ្ពស់ចំពោះអាជ្ញាធរ និង កងកម្លាំងមានសមត្ថកិច្ចគ្រប់លំដាប់ថ្នាក់ ទូទាំងស្រុកបវេល ដែលបានខិតខំបំពេញការងារស្របតាម តួនាទីភារកិច្ចរបស់ខ្លួនដើម្បីបម្រើសំណូមពរ និងសេចក្តីត្រូវការនានារបស់ប្រជាពលរដ្ឋ ព្រមទាំង បានចូលរួមបំពេញការងារនានាពាក់ព័ន្ធការបោះឆ្នោតនេះបានយ៉ាងល្អប្រសើរ ស្របតាមច្បាប់ បោះឆ្នោតតម្រូវ។

ឯកឧត្ដម សក់ សេដ្ឋា បានគូសបញ្ជាក់ថា នៅក្នុងដំណើរការបោះឆ្នោតតាមគោលការណ៍នៃលទ្ធិប្រជាធិបតេយ្យសេរីពហុបក្សនៅ កម្ពុជា គណបក្សប្រជាជនកម្ពុជាតែងតែទទួលបានជោគជ័យយ៉ាងត្រចះត្រចង់ជាបន្តបន្ទាប់ ក្នុងនោះរួមទាំង ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២, ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣, និងការបោះឆ្នោតជ្រើសតាំង សមាជិកព្រឹទ្ធសភា នីតិកាលទី៥ ឆ្នាំ២០២៤នេះ។
ឯកឧត្ដមបញ្ជាក់បន្ថែមថា លើមូលដ្ឋាននៃជោគជ័យជាបន្តបន្ទាប់របស់ គណបក្សក្នុងការបោះឆ្នោតទាំងនេះ យើងទាំងអស់គ្នាជាក្រុមការងារ និងគណបក្សគ្រប់ថ្នាក់នៃ ស្រុកបវេល, អង្គបោះឆ្នោតជាសមាជិកក្រុមប្រឹក្សាឃុំ សង្កាត់ក្នុងមុខតំណែងទាំងអស់, បេក្ខជន ក្រុមប្រឹក្សាខេត្តបាត់ដំបង និងបេក្ខជនក្រុមប្រឹក្សាស្រុកបវេលគ្រប់ៗរូប នឹងបន្តការប្តេជ្ញាចិត្តរួមគ្នា ពុះពារដណ្តើមជោគជ័យយ៉ាងត្រចះត្រចង់ ជូនគណបក្សប្រជាជនកម្ពុជា ក្នុងការបោះឆ្នោតជ្រើសរើស ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ខាងមុខនេះ ដើម្បីគណបក្សប្រជាជនកម្ពុជាបន្តគ្រប់គ្រងដឹកនាំប្រទេសជាតិ ទាំងនៅថ្នាក់ជាតិ និងថ្នាក់ក្រោមជាតិទាំងមូល សំដៅបន្តបំពេញ បេសកកម្មប្រកបដោយជោគជ័យ ក្នុងការកសាងអភិវឌ្ឍប្រទេសជាតិឱ្យសម្រេចបានបានចក្ខុវិស័យ កម្ពុជាឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងបន្តឈានទៅសម្រេចបានចក្ខុវិស័យ ឆ្នាំ២០៥០ ជាប្រទេសមានចំណូលខ្ពស់ ៕