ឯកឧត្តម សុខ វាសនា ថ្លែងអំណរគុណចំពោះអាជ្ញាធរ និងកងកម្លាំងមានសមត្ថកិច្ចក្នុងស្រុកពោធិ៍រៀង ដែលបានយកចិត្តទុកដាក់ការពារសន្តិសុខ និងសណ្តាប់ធ្នាប់ក្នុងអំឡុងពេលយុទ្ធនាការឃោសនាបោះឆ្នោត កន្លងមកនេះ

ភ្នំពេញ៖ នៅព្រឹកថ្ងៃសុក្រ ទី២៤ ខែឧសភា ឆ្នាំ២០២៤ ឯកឧត្តម សុខ វាសនា សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានក្រុមការងារគណបក្សចុះមូលដ្ឋានខេត្តព្រវែង និងជាប្រធានក្រុមការងារគណបក្សចុះមូលដ្ឋានស្រុកពោធិ៍រៀង បានអញ្ជើញជាអធិបតីក្នុងពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក អាណត្តិទី៤ ឆ្នាំ២០២៤ នៅស្នាក់ការគណបក្សស្រុកពោធិ៍រៀង។

ពិធីនេះក៏មានការចូលរួមពី លោកប្រធានគណៈកម្មាធិការគណបក្សស្រុកពោធិ៍រៀង ក្រុមការងារគណបក្សចុះមូលដ្ឋានស្រុកពោធិ៍រៀង បេក្ខជន អង្គបោះឆ្នោត និងសមាជិក-សមាជិកាគណបក្សនៃស្រុកពោធិ៍រៀងជាច្រើនរូបទៀត។

ជាកិច្ចចាប់ផ្តើម លោកប្រធានគណបក្សស្រុកពោធិ៍រៀង បានឡើងអានរបាយការណ៍អំពីលទ្ធផលនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក របស់គណបក្សប្រជាជនកម្ពុជាស្រុកពោធិ៍រៀង ជូនដល់អង្គពិធី។

ក្នុងឱកាសនោះ ឯកឧត្តម សុខ វាសនា ប្រធានក្រុមការងារគណបក្សស្រុកពោធិ៍រៀង បានមានមតិដោយបានធ្វើការកោតសរសើរ និងវាយតម្លៃខ្ពស់ចំពោះគណៈកម្មាធិការគណបក្សស្រុក គណបក្សឃុំ និងសមាជិក-សមាជិកាគណបក្សនៅក្នុងស្រុកពោធិ៍រៀងទាំងអស់ដែលបានចូលរួមយ៉ាងសកម្មនៅក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤ ប្រកបដោយជោគជ័យ អហិង្សា និងសុវត្ថិភាព។

ជាមួយគ្នានោះ ឯកឧត្តមប្រធានក្រុមការងារ ក៏បានថ្លែងអំណរគុណចំពោះអាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ក្នុងស្រុកពោធិ៍រៀង ដែលបានយកចិត្តទុកដាក់ការពារសន្តិសុខ និងសណ្តាប់ធ្នាប់សាធារណៈក្នុងមូលដ្ឋានបានយ៉ាងល្អប្រសើរនៅក្នុងអំឡុងពេលយុទ្ធនាការឃោសនាបោះឆ្នោត រយៈពេលពេញ ១សប្តាហ៍កន្លងមកនេះ ក៏ដូចជាសម្រាប់ការបោះឆ្នោតនៅថ្ងៃអាទិត្យ ទី២៦ ខែឧសភា ឆ្នាំ២០២៤ ខាងមុខនេះផងដែរ។

ជាទីបញ្ចប់ ឯកឧត្តមប្រធានក្រុមការងារ បានណែនាំ និងផ្តាំផ្ញើដល់គណៈកម្មាធិការគណបក្សស្រុក គណបក្សឃុំ បេក្ខជន ជាពិសេសអង្គបោះឆ្នោតទាំងអស់ត្រូវត្រៀមលក្ខណៈ និងឯកសារពាក់ព័ន្ធឱ្យបានរួចរាល់សម្រាប់ការបោះឆ្នោតនៅថ្ងៃអាទិត្យនេះ ព្រមទាំងត្រូវខិតខំថែរក្សាសុខភាពឱ្យបានល្អប្រសើរ។

បន្ទាប់មក ឯកឧត្តមប្រធានក្រុមការងារ បានអញ្ជើញដឹកនាំការដង្ហែក្បួនឃោសនារបស់គណបក្សប្រជាជនកម្ពុជានៅជុំវិញស្រុក និងនៅតាមបណ្តាឃុំទាំង៦ នៃស្រុកពោធិ៍រៀង ផងដែរ ៕