ឯកឧត្តមរដ្ឋមន្ត្រី ថោ ជេដ្ឋា អញ្ជើញចុះពិនិត្យស្ថានភាពប្រព័ន្ធធារាសាស្ត្រ៣០កញ្ញា ក្នុងភូមិសាស្ត្រខេត្តកំពង់ធំ

ភ្នំពេញ៖ ឆ្លៀតក្នុងឱកាសចុះបំពេញបេសកកម្មការងារនៅខេត្តកំពង់ធំ នារសៀលថ្ងៃសុក្រ ២រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៤ ខែឧសភា ឆ្នាំ២០២៤នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយឯកឧត្តមថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តកំពង់ធំ បានអញ្ជើញចុះពិនិត្យស្ថានភាពប្រព័ន្ធធារាសាស្ត្រ៣០កញ្ញា ដែលស្ថិតនៅក្នុងស្រុកស្ទោង ខេត្តកំពង់ធំ។

សូមជម្រាបថា ប្រព័ន្ធធារាសាស្ត្រ៣០កញ្ញា បានទទួលប្រភពទឹកពីអាងស្ទឹងស្ទោង ស្ថិតនៅឃុំតាគ្រាម ស្រុកស្ទោង ខេត្តកំពង់ធំ។ ប្រព័ន្ធធារាសាស្ដ្រនេះគឺសម្រាប់បម្រើដល់វិស័យកសិសកម្ម និងការប្រើប្រាស់ក្នុងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋក្នុងឃុំចំនួន១១ និងស្រុកចំនួន៣ នៃខេត្តកំពង់ធំ។

បើតាមរបាយការណ៍របស់នាយកដ្ឋានធារាសាស្ត្រកសិកម្មបានឱ្យដឹងថា ប្រព័ន្ធធារាសាស្ត្រ៣០កញ្ញា ស្ថិតក្នុងចំណោមប្រព័ន្ធធារាសាស្ត្រខ្នាតធំចំនួន១២ នៅតាមបណ្តាខេត្តចំនួន១២ រួមមាន៖ ខេត្តបាត់ដំបង ខេត្តកំពង់ឆ្នាំង ខេត្តកំពង់ធំ ខេត្តកំពត ខេត្តកណ្តាល ខេត្តឧត្តរមានជ័យ ខេត្តបន្ទាយមានជ័យ ខេត្តសៀមរាប ខេត្តព្រៃវែង ខេត្តត្បូងឃ្មុំ ខេត្តតាកែវ និងខេត្តពោធិ៍សាត់ ដែលទទួលបានគម្រោងការងារថែទាំជាប្រចាំ (O&M) ក្នុងឆ្នាំ២០២៤នេះ ដែលក្នុងនោះមានការថែទាំខ្នងនិងជើងទេរទំនប់ប្រវែង ១៤,៣១៦ម៉ែត្រ ថែទាំខ្នងនិងជើងទេរប្រឡាយប្រវែង ៦២,២៩២ម៉ែត្រ និងថែទាំសំណង់សិល្បការ្យចំនួន ១៦៤កន្លែង ៕