ព្រះរាជពិធីបុណ្យច្រត់ព្រះនង្គ័លជានិមិត្តរូបមេបា
ភ្នំពេញ៖ នាឱកាសនៃព្រះរាជពិធីបុណ្យច្រត់ព្រះនង្គ័លថា ក្នុងសង្គមខ្មែរ បើពោលអំពីព្រះរាជពិធីបុណ្យច្រត់ព្រះនង្គ័លដែលប្រារព្ធធ្វើឡើងនៅក្រុងច្បារមនខេត្តកំពង់ស្ពឺ ថ្ងៃទី២៦ ខែឧសភា ឆ្នាំ២០២៤ ដែលស្ថិតក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃកម្ពុជា និងមានការអញ្ជើញចូលរួមពីសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា, សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា, សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងមន្រ្តីអ្នកមុខអ្នកការគ្រប់លំដាប់ថ្នាក់ និងប្រជាពលរដ្ឋយ៉ាងច្រើនកុះករដ៏អធិកអធម និងសប្បាយរីករាយក្នុងកម្ពុជរដ្ឋដែលពោរពេញដោយសន្តិភាពដ៏ស្រស់បវរនៃយើងនេះ ។
បើពោលអំពីប្រព័ន្ធជំនឿនៃព្រះរាជពិធីបុណ្យច្រត់ព្រះនង្គ័លនេះ គឺជានិមិត្តរូបនៃអង្គជាត ដែលបានជ្រាបចូលនិងបង្កកំណើតកើតចេញជាផលតាមរយៈព្រះនាងធរណី គឺរវាងព្រះស្ថានសួគ៌មេឃ និងព្រះនាងធរណី បង្កើតជាភោគផលជា «ស្រូវ ឬព្រះមេ» ព្រោះដំណើរវដ្ដនៃស្រូវមិនខុសពីស្រ្ដីនោះទេ។ ហេតុនេះចំពោះគំនិតក្នុងការភ្ជួររាស់ ដែលធ្វើទ្បើងដោយម្ចាស់ដីខ្មែរ គឺព្រះមហាក្សត្រ ជានិមិត្ដរូបព្រះព្រហ្ម, គោឧសភរាជជានិមិត្ដរូបព្រះអាទិត្យ ឯនង្គ័ល ជានិមិត្ដរូប វរាហៈ គឺជាជ្រូកព្រៃ អវតាររបស់ព្រះវិស្ណុ ក្នុងការជួយមនុស្សលោក ។
បើពោលឲ្យចំ ចំពោះគំនិតនៃព្រះរាជពិធីបុណ្យច្រត់ព្រះនង្គ័ល ក្នុងការភ្ជួររាស់ម្ចាស់ដី ស្ថិតក្រោមព្រះរាជាធិបតីភាពដ៏ខ្ពង់ខ្ពស់របស់ព្រះមហាក្សត្រតាំងពីបឋមកាលមកនេះ បានសឲ្យឃើញបានអំពីកំណកំនើតនៃប្រទេសកម្ពុជា និងកម្មសិទ្ធប្រើប្រាស់ដីធ្លីរបស់ប្រជាជាតិខ្មែរតាំងពីបុរាណរៀងមក។ ព្រោះនង្គ័លជានិមិត្តរូបដ៏មានឥទ្ធិពលលើអំណាចធម្មជាតិ និងសម្រាប់ផ្ដល់សញ្ញាដល់សង្គមថា បានចាកចេញពីសង្គមបុព្វកាលបរបាញ់ មកជាសង្គមកសិកម្មស៊ីវិល័យ ហៅថា «ការផ្លាស់ប្ដូរសង្គមមនុស្សពីព្រៃ មកស្រុក» ។ ហេតុនេះនេះចំពោះពិធីច្រត់ព្រះនង្គ័ល ក្រៅពីកម្ពុជាយើង ក៏មានប្រទេសជាច្រើនផ្សេងទៀតលើពិភពលោក មានទំនៀមច្រត់ព្រះនង្គ័លនេះផងដែរ មានដូចជាក្រិច អេហ្ស៊ីប ចិន ថៃ ភូមា និងឥណ្ឌា ជាដើម។
ស្ថិតក្នុងទំនៀមទាក់ទងនឹងការភ្ជួររាស់នេះ ដំបូងទ្បើយគេជឿថាមនុស្សនឹងអាចកែប្រែធម្មជាតិតាមរយៈកិច្ចបូជាចំពោះព្រះ ដើម្បីឲ្យភោគផលដំណាំបានល្អប្រសើរនិងទទួលបានទិន្នផលខ្ពស់។ ជាក់ស្តែងដូចយើងឃើញប្រពៃណីព្រះរាជពិធីច្រត់ព្រះនង្គ័ល ដែលបានប្រារព្ធធ្វើឡើងនៅថ្ងៃទី២៦ ខែឧសភា ឆ្នាំ២០២៤ នៅវាលព្រះស្រែ ខេត្តកំពង់ស្ពឺនេះ ដែលក្នុងការរៀបចំអាហារ៧មុខ តែត្រូវបានគោឧសភរាជបរិភោគអាហារចំនួនតែ៣មុខប៉ុណ្ណោះ គឹមានស្រូវមានចំនួនដល់ទៅ៩៥ភាគរយ ពោត ៩៥ភាគរយ និងសណ្ដែក ៨៥ភាគរយ ជាប្រផ្នូលបញ្ជាក់ឲ្យឃើញថា រាល់ផលដំណាំកសិកម្មទាំង៣មុខនេះនឹងទទួលបានទិន្នផលល្អប្រសើរ ជាទីគួរគាប់ចិត្ដក្នុងឆ្នាំនេះ។
បើពោលអំពីប្រវត្ដិនៃព្រះរាជពិធីបុណ្យច្រត់ព្រះនង្គ័លវិញ ខ្មែរបុរាណ បានស្គាល់ច្បាស់ព្រះពលរាម ឬពលទេព គឺកាន់នង្គ័លជាកេតនភណ្ឌ ដ្បិតមកដល់សម័យកណ្តាល ពាក្យថា ឧកញ៉ាពលទេព ជាមុខងារមន្ត្រីខ្ពង់ខ្ពស់ ដែលកាន់កាប់គ្រប់គ្រងកសិកម្មក្នុងប្រទេសទាំងមូល។ មួយវិញទៀត គេដឹងថាព្រះពលរាម ហៅថា (សង្កឞ៌ណ) មានអត្ថន័យពីរយ៉ាង គឺទីមួយ៖ ភ្ជួរដី និងទីពីរ៖ ដែលទាញចេញ ។ មិនតែប៉ុណ្ណោះ ច្បាប់សម្រាប់គ្រប់គ្រងវិសយ័កសិកម្មនេះទៀតសោត ក៏មានឈ្មោះថា ក្រមពលទេព ទៀតផង។ ដូច្នេះព្រះរាជពិធីបុណ្យច្រត់ ព្រះពលទេព ជាទេពមួយដែលមានតួនាទី នៅក្នុងព្រះរាជពិធីច្រត់ព្រះនង្គ័ល តាំងពីបុរាណ រហូតមកដល់បច្ចុប្បន្ន៕
