ឯកឧត្តម សុខុម រិទ្ធីវុធ ដឹកនាំប្រជុំផ្សព្វផ្សាយនៃសារៈប្រយោជន៍ការចុះបញ្ជីវិស្វករនៅសាលប្រជុំអង្គរវត្ត នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍
ភ្នំពេញ៖ សិក្ខាសាលាផ្សព្វផ្សាយស្តីពីសារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា បានរៀបចំឡើងនាសាលប្រជុំអង្គរវត្ត ជាន់ទី៩ អគារ ចម ប្រសិទ្ធ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រោមអធិបតីភាព ឯកឧត្តម សុខុម រិទ្ធីវុធ អគ្គលេខាធិការគណៈវិស្វករកម្ពុជា និង ឯកឧត្តម គួកហ្វីដេរ៉ូ អនុរដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រួមជាមួយនឹងសិក្ខាកាមដែលអញ្ជើញមកដោយផ្ទាល់ និងតាមប្រព័ន្ធអនឡាញ ជាមន្រ្តីរាជការនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានជំនាញវិជ្ជាជីវៈជាវិស្វករប្រមាណសរុប ២៥០នាក់។
មានមតិស្វាគមន៍នេះដែរ ឯកឧត្តម គួក ហ្វីដេរ៉ូ មានប្រសាសន៍ថា ការអភិវឌ្ឍជាតិ និងសមាហរណកម្មសេវាវិស្វកម្មតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើសេវាវិស្វកម្ម ក្នុងតំបន់អាស៊ាន ដែលនឹងប្រព្រឹត្តទៅដោយរលូន និងទទួលបានជោគជ័យនោះ ចាំបាច់ត្រូវមានមូលដ្ឋានគតិយុត្ត និងធនធានបញ្ញវន្តវិស្វករជាតិប្រកបដោយគុណភាពស្តង់ដារមួយដែលអាចទទួលយកបាន ដូច្នេះហើយបានជាគណៈវិស្វករកម្ពុជាតម្រូវឱ្យមានការចុះបញ្ជីវិស្វករនៅគណៈវិស្វករកម្ពុជា។
ឯកឧត្តមបន្តថា ការប្រព្រឹត្តទៅរបស់គណៈវិស្វករកម្ពុជា បានឆ្លុះបញ្ចាំងពីគុណប្រយោជន៍សាធារណៈសហគមន៍វិជ្ជាជីវៈ និងរូបវន្តបុគ្គលជាវិស្វករផ្ទាល់ ហើយយើងមានធនធានបញ្ញវន្តជាតិជាវិស្វករមានកម្រិតវិជ្ជាជីវៈស្តង់ដារ ព្រមទាំងសមត្ថភាពជំនាញ និងមានក្រមសីលធម៌វិជ្ជាជីវៈ គឺជាសក្តានុពលមួយផ្នែកដ៏មានប្រសិទ្ធភាពក្នុងការអភិវឌ្ឍសង្គមសេដ្ឋកិច្ចតាមរយៈលទ្ធផលការងារល្អ និងការទទួលខុសត្រូវចំពោះភារកិច្ចដែលប្រទេសជាតិផ្តល់ឱ្យ។
ក្នុងន័យដ៏សំខាន់នេះឯកឧត្តមយល់ឃើញថា គណៈវិស្វករកម្ពុជាមានគោលបំណងចម្បង២ ៖
ទី១ គឺធ្វើឱ្យគុណភាពប្រតិបត្តិជំនាញរបស់វិស្វករជាតិមានស្តង់ដារដើម្បីឱ្យមានការទទួលស្គាល់គ្នាទៅវិញទៅមករវាងបណ្តាប្រទេសជាសមាជិកអាស៊ានស្របទៅតាមកិច្ចព្រមព្រៀង ដែលបានចុះហត្ថលេខាជាមួយគ្នានៅថ្ងៃទី ០៩ ខែធ្នូ ឆ្នាំ២០០៥ នៅទីក្រុងកូឡាឡាំពួរ ប្រទេសម៉ាឡេស៊ី។
ទី២ គឺមានក្រមសីលធម៌វិជ្ជាជីវៈល្អ ដើម្បីទទួលឱកាសការងារទូលំទូលាយ និងចុះសម្រុងក្នុងសង្គម។ លក្ខណៈសម្បត្តិទាំងពីរនេះ គឺជាសេចក្តីត្រួវការធនធានវិស្វករពិតប្រាកដ ដើម្បីការអភិវឌ្ឍជាតិ និងការទុកចិត្តរបស់អតិថិជន ដែលត្រូវការសេវាវិស្វកម្ម។
ក្នុងឱកាសផ្សព្វផ្សាយសិក្ខាសាលានេះដែរ ឯកឧត្តម សុខុម រិទ្ធីវុធ មានប្រសាសន៍ថា អគ្គលេខាធិការដ្ឋានគណៈវិស្វករកម្ពុជា ក្រោមការចង្អុលបង្ហាញសុំគោលការពី ឯកឧត្តម ហេង សួរ រដ្ឋមន្រ្តី ក្រសួងការងារ និងបណ្តុះបណ្តាលវិជ្ជាជីវៈ បានអោយគណៈវិស្វករកម្ពុជា រៀបចំសិក្ខាសាលាផ្សព្វផ្សាយ ជូនដល់វិស្វករដែលនៅតាម ក្រសួង មន្ទីរ ស្ថាប័ន ក្រុមហ៊ុន តាមបណ្តាលរាជធានី ខេត្ត ក្រុង ដើម្បីសម្រេចអោយបានគោលដៅដែលជាចក្ខុវិស័យទិសដៅរបស់គណៈវិស្វករកម្ពុជា ដូចនេះគណៈវិស្វករកម្ពុជាបានរៀបចំផែនការយុទ្ធសាស្រ្ត ៤ចំណុចច្បាស់លាស់ ដើម្បីធ្វើឱ្យវិស្វករជាតិយើងទទួលបានផលប្រយោជន៍ពីការចុះបញ្ជីវិស្វករនៅគណៈវិស្វករកម្ពុជា គឺ៖ទី១- បានរៀបចំផ្សព្វផ្សាយឯកសារច្បាប់កត្តិយុទ្ធនានា និងចុះបញ្ជីវិស្វករដែលមានបំណង និងកំពុងប្រកបវិជ្ជាជីវៈវិស្វកម្មក្នុងព្រះរាជាណាចក្រកម្ពុជា ទី២- អភិវឌ្ឍន៍សមត្ថភាពវិជ្ជាជីវៈវិស្វកម្មគ្រប់មុខជំនាញ ទី៣- ការពារនិងផ្តល់ឱកាសឱ្យមានការងារជូនដល់វិស្វករជាតិដោយស្របច្បាប់ទាំងក្នុងជាតិនិងអន្តរជាតិ និងទី៤- វាយតម្លៃ និងបញ្ជូនវិស្វករអាជីពជាតិ ឱ្យទទួលបានគោរមងារជាវិស្វករអាស៊ាន និងវិស្វករអាជីពឆ្នើមអាស៊ាន ដើម្បីទទួលបានកិច្ចព្រមព្រៀងបម្លាស់ទីទៅធ្វើការទាំងក្នុងជាតិ និងអន្តរជាតិដោយស្របច្បាប់ថែមទៀត។
អគ្គលេខាធិការដ្ឋានគណៈវិស្វករកម្ពុជា ត្រូវបានបង្កើតឡើងតាមព្រះរាជក្រឹត្យលេខ នស/រកត/០៤០៩/៤១៣ ចុះថ្ងៃទី០៧ ខែមេសា ឆ្នាំ២០០៩។
គណៈវិស្វករកម្ពុជាមានគោលបំណងចម្បង គឺការអភិវឌ្ឍសង្គមសេដ្ឋកិច្ចឱ្យបានល្អប្រសើរឡើង ដោយចាប់ផ្តើមពីការប្រមូលផ្តុំធនធានបញ្ញវន្តវិស្វកម្មជាតិ ការអភិវឌ្ឍសមត្ថភាពប្រតិបត្តិវិជ្ជាជីវៈ និងការផ្តល់ឱកាសការងារដោយស្របច្បាប់ទាំងក្នុងជាតិ និងអន្តរជាតិ។ ដើម្បីធានាបានការអភិវឌ្ឍន៍ដោយចីរភាពក្នុងបរិបទកម្ពុជា រាជរដ្ឋាភិបាលក្រោមការដឹកនាំដ៏ឈ្លាសវៃ និងទទួលខុសត្រូវខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសគណៈវិស្វករកម្ពុជា និងដោយជោគជ័យនូវយុទ្ធសាស្ត្ររបស់រាជរដ្ឋាភិបាល ដែលក្នុងនោះការកសាងសមត្ថភាពធនធានមនុស្សក៏ដូចជាការកសាងធនធានបញ្ញវន្តវិស្វករជាតិជាកត្តាចម្បងក្នុងវិស័យវិជ្ជាជីវៈឌីជីថលជំនាន់ថ្មី ៤.០។
ឯកឧត្តម បានបញ្ជាក់ថា គណៈវិស្វករកម្ពុជា ជាអាជ្ញាធរវិស្វកម្មជាតិ មានភារកិច្ចគ្រប់គ្រងប្រមូលផ្តុំវិស្វករគ្រប់ជំនាញដូចជា វិស្វកម្មសំណង់ស៊ីវិល វិស្វកម្មសំណង់ស្ពានថ្នល់ អភិវឌ្ឍនជនបទ វិស្វកម្មរ៉ែប្រែងកាត ថាមពល អគ្គិសនី មេកានិច អេឡិកត្រូនិក ៕
