កាកបាទក្រហមកម្ពុជា ផ្ដល់គ្រឿងឧបភោគបរិភោគ និងថវិកាមួយចំនួន ចូលរួមរំលែកទុក្ខគ្រួសារចំនួន២ ដែលកូនបាត់បង់ជីវិតក្នុងឧបទ្ទវហេតុគ្រោះថ្នាក់ចរាចរណ៍ នៅស្រុកស្វាយជ្រំ ខេត្តស្វាយរៀង

ភ្នំពេញ៖ ដោយមើលឃើញពីសេចក្តីសោកសង្រេងនូវទឹកចិត្តរបស់ឳពុកចំពោះការបាត់បង់កូនជាទីស្រឡាញ់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា និងលោកជំទាវ ដួង វណ្ណា ប្រធានកិត្តិយសសាខាកាកបាទក្រហមកម្ពុជា ខេត្តស្វាយរៀង ព្រមទាំងថ្នាក់ដឹកនាំនិងក្រុមប្រតិបត្តិសាខា បានចុះសួរសុខទុក្ខ និងនាំយកគ្រឿងឧបភោគបរិភោគ និងថវិកាមួយចំនួន ចូលរួមរំលែកទុក្ខ ចំនួន២គ្រួសារ ដែលមានកូនបាត់បង់ជីវិតក្នុងឧបទ្ទវហេតុគ្រោះថ្នាក់ចរាចរណ៍។

គ្រួសាររងគ្រោះទាំង២ មានទីលំនៅក្នុងភូមិត្របែកប្រហោង ឃុំតាសួស ស្រុកស្វាយជ្រំ ខេត្តស្វាយរៀង។
បញ្ជាក់ ៖ អព្យាក្រឹត្យភាព គឺជាគោលការណ៍គ្រឹះ១ក្នុងចំណោមគោលការណ៍គ្រឹះ៧ របស់កាកបាទក្រហមកម្ពុជា។ គោលការណ៍ អព្យាក្រឹត្យភាពនេះ គឺកាកបាទក្រហមកម្ពុជា មិនលូកដៃឬវែកញែករកខុសត្រូវក្នុងរឿងណាមួយឡើយ ហើយសកម្មភាពមនុស្សធម៌របស់កាកបាទក្រហមកម្ពុជា គឺជាការជួយសម្រាលការលំបាករបស់ប្រជាពលរដ្ឋរងគ្រោះនិងងាយរងគ្រោះបំផុត ដោយមិនរើសអើង ជាតិសាសន៍ ពណ៌សម្បុរ ឬនិន្នាការនយោបាយនោះឡើយ។

ជាមួយគ្នានេះ ឯកឧត្តមវេជ្ជ. អ៊ុយ សំអាត បាននាំប្រសាសន៍ចូលរួមរំលែកទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាមួយគ្រួសារសពទាំងពីរ ដែលបានបាត់បង់កូនជាទីស្រឡាញ់ និងសូមឧទ្ទិសបួងសួងដល់ដួងវិញ្ញាណក្ខន្ធ យុវជន ផាត ភារិត និងយុវជន តូច សុធា សូមបានចាប់កំណើតកើតក្នុងសុគតិភព កុំបីឃ្លៀងឃ្លាតឡើយ៕