ពលរដ្ឋដែលរងផលប៉ះពាល់ដោយសារឧបទ្ទវហេតុបាក់ច្រាំងមាត់ព្រែក ទទួលបានអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្ដាល
ភ្នំពេញ៖ ប្រជាពលរដ្ឋដែលរងផលប៉ះពាល់ដោយសារឧបទ្ទវហេតុបាក់ច្រាំងមាត់ព្រែក ហើយត្រូវបានរុះរើលំនៅឋានចេញពីទីកន្លែងរងគ្រោះចំនួន ៦ខ្នង ស្មើនឹង ៧គ្រួសារ សមាជិកសរុប ២៧នាក់ បានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្ដាល នាព្រឹកថ្ងៃទី៣១ ខែឧសភា ឆ្នាំ២០២៤។
ឯកឧត្តម គង់ សោភ័ណ្ឌ អភិបាលខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានចាត់ឱ្យលោក ទៀង សុគន្ធ នាយកសាខា ដឹកនាំក្រុមប្រតិបត្តិសាខា ,អនុសាខា ស្រុក និងក្រុមកាកបាទក្រហមឃុំលើកដែក បានចុះសួរសុខទុក្ខ និងនាំយកអំណោយសង្គ្រោះបន្ទាន់ទៅឧបត្ថម្ភជូនដល់ជនរងគ្រោះតាមអាសយដ្ឋានខាងលើដោយផ្ទាល់ផងដែរ។
មានមតិសំណេះសំណាលក្នុងឱកាសនោះ លោក ទៀង សុគន្ធ បាននាំមកនូវប្រសាសន៍ផ្ដាំផ្ញើសាកសួរសុខទុក្ខពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងឯកឧត្តម គង់ សោភ័ណ្ឌ ប្រធានគណៈកម្មាធិការសាខា ដោយក្ដីនឹករលឹក និងក្តីអាណិតអាសូរក្រៃលែង។
លោកនាយកបានបន្តទៀរថា កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ជានិច្ចកាលសម្ដេចតែងបានគិតគូរជានិច្ចអំពីសុខទុក្ខរបស់បងប្អូនប្រជាពលរដ្ឋទូទៅនៅគ្រប់ទីកន្លែង និងគ្រប់ពេលវេលា ហើយសម្តេចក៏បានណែនាំជាប្រចាំដល់មន្រ្តីនៅថ្នាក់មូលដ្ឋានទាំងអស់ ត្រូវពិនិត្យមើលពីជីវភាពរស់នៅរបស់ប្រជាពលរដ្ឋ និងចុះសួរសុខទុក្ខដល់ជនងាយរងគ្រោះបំផុត និងជនរងគ្រោះមហន្តរាយផ្សេងៗ ដោយមិនប្រកាន់ពូជសាសន៍ សាសនា ប្រពៃណី ពណ៌សម្បុរ ឬនិន្នាការនយោបាយឡើយ។
នៅក្នុងឱកាសនោះដែរ លោកនាយកសាខាក៏បានសម្តែងនូវការសោកស្តាយជាមួយគ្រួសាររងគ្រោះទាំងអស់ ព្រមទាំង បានផ្តល់នូវការលើកទឹកចិត្ត ត្រូវខិតខំប្រកបរបររកស៊ីចិញ្ចឹមគ្រួសារបន្តទៀត និងទៅសាងសង់លំនៅឋានថ្មី ដែលជាទីកន្លែងមានសុវត្ថិភាពល្អ ដោយរស់នៅបានសមរម្យសម្រាប់ថ្ងៃខាងមុខ។
អំណោយដែលសាខាបានផ្តល់ជូនជនរងគ្រោះក្នុង១គ្រួសារមាន៖ អង្ករ ៥០ គីឡូក្រាម ,មី ១កេស ,ទឹកសុទ្ធ ១កេស ,ទឹកត្រី ១យួរ ,ត្រីខកំប៉ុង ១យួរ ,ឃីតមានៈ (មុង,ភួយ,ក្រមា,អាវយឺត និងសាប៊ូ) ១កញ្ចប់ ,កៅស៊ូតង់ ១ផ្ទាំង និងថវិកាចំនួន ៣២០,០០០រៀល៕
