អភិបាលខេត្តកំពង់ឆ្នាំង៖ ប្រជាការពារបានដើរតួនាទីយ៉ាងសំខាន់ ក្នុងកិច្ចការពារសន្តិសុខ សុវត្ថិភាព ជូនពលរដ្ឋនៅក្នុងមូលដ្ឋាន

ភ្នំពេញ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា ប្រជាការពារបានដើរតួនាទីយ៉ាងសំខាន់ ក្នុងកិច្ចការពារសន្តិសុខ សុវត្ថិភាព ជូនដល់ប្រជាពលរដ្ឋនៅក្នុងមូលដ្ឋាន។

ឯកឧត្តមអភិបាលខេត្ត បានថ្លែងបែបនេះ នៅក្នុងកិច្ចប្រជុំផ្សព្វផ្សាយ សម្រាប់ការបណ្តុះបណ្តាលអំពីតួនាទីភារកិច្ច និងសិទ្ធិរបស់ប្រជាការពារ នាព្រឹកថ្ងៃទី៦ ខែមិថុនា ឆ្នាំ២០២៤។

ឯកឧត្តម ស៊ុន សុវណ្ណារិទ្ធិ អភិបាលខេត្ត បានបញ្ជាក់ថា ប្រជាការពារគឺជាកម្លាំងស្នូលនៅថ្នាក់មូលដ្ឋាន ក្នុងការអនុវត្តគោលនយោបាយភូមិ ឃុំ សង្កាត់ មានសុវត្ថិភាព។ រួមចំណែកក្នុងកិច្ចការពារសន្តិសុខ សុវត្ថិភាព សណ្តាប់ធ្នាប់ ជូនប្រជាពលរដ្ឋ ដោយសហការជាមួយកម្លាំងសមត្ថកិច្ច។ ហើយកម្លាំងនេះជាសេនាធិការយ៉ាងសំខាន់របស់ប៉ុស្តិរដ្ឋបាល ឃុំ សង្កាត់ ក្នុងការចូលរួមទប់ស្កាត់ និងបង្ក្រាបបទល្មើសគ្រប់ប្រភេទ។

ឯកឧត្តមអភិបាលខេត្ត បានបន្តថា ឃុំ សង្កាត់ មានសុវត្ថិភាព ជាក្តីប្រាថ្នារបស់ប្រជាពលរដ្ឋគ្រប់រូប ដែលក្នុងរយៈពេលកន្លងទៅនេះ ប្រជាការពារបានបំពេញការងារយ៉ាងសកម្ម ជាមួយអាជ្ញាធរមូលដ្ឋាន ក្នុងកិច្ចការពារសន្តិសុខ សណ្តាប់ធ្នាប់ជូនប្រជាពលរដ្ឋ នៅគ្រប់មូលដ្ឋាន។

សូមបញ្ជាក់ថា ប្រជាការពារនៅទូទាំងខេត្តកំពង់ឆ្នាំង មានចំនួន ៤៧៣ក្រុម ហើយនៅក្នុងពេលខាងមុខនេះ ប្រជាកាពារទាំងអស់ នឹងត្រូវបានការបណ្តុះបណ្តាល អំពីតួនាទី ភារកិច្ច និងសិទ្ធិរបស់ប្រជាការពារផងដែរ ៕