សម្ដេចធិបតី៖ ទឹកដីសៀមរាបកាលពីជាង២០ឆ្នាំមុន គឺជាអតីតតំបន់សមរភូមិដែលមានការប្រយុទ្ធគ្នាយ៉ាងខ្លាំងក្លា

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ទឹកដីសៀមរាបដែលលោកអ្នកកំពុងអញ្ជើញចូលរួមក្នុងមហាសន្និបាតសភាយុវពាណិជ្ជកម្មអន្តរជាតិប្រចាំតំបន់អាស៊ីប៉ាស៊ីហ្វិកនៅពេលនេះ កាលពីជាង២០ ឆ្នាំមុន គឺជាអតីតតំបន់សមរភូមិដែលមានការប្រយុទ្ធគ្នាយ៉ាងខ្លាំងក្លា។

សម្តេចធិបតី ហ៊ុន ម៉ាណែត បានថ្លែងបែបនេះ ក្នុងឱកាសអញ្ជើញបើកមហាសន្និបាតតំបន់អាស៊ី និងប៉ាស៊ីហ្វិកនៃសភាយុវពាណិជ្ជករអន្តរជាតិ ប្រចាំឆ្នាំ២០២៤ នៅខេត្តសៀមរាប នាល្ងាចថ្ងៃទី៦ ខែមិថុនា ឆ្នាំ២០២៤នេះ។

សម្តេចធិបតី បានបញ្ជាក់ថា ហេតុនេះ សូមយុវជន ទាំងអស់មេត្តារួមគ្នារក្សាសុខសន្តិភាពឱ្យខាងតែបាន។

សម្ដេចធិបតីបន្ថែមថា គោលនយោបាយឈ្នះ ឈ្នះរបស់កម្ពុជា ដែលធ្វើឱ្យគ្រប់ភាគីជម្លោះទទួលយកបាន និងបានធ្វើឱ្យកម្ពុជាមានសុខសន្តិភាព ដល់សព្វថ្ងៃ អាចជាគំរូមួយសម្រាប់ដោះស្រាយជម្លោះនៅប្រទេសនានាបាន៕