កាកបាទក្រហមកម្ពុជា ផ្ដល់អំណោយជូនលោកគ្រូ អ្នកគ្រូ និងនិស្សិតចំនួន ៤៤១នាក់ ដែលមានជីវភាពខ្វះខាត
ភ្នំពេញ៖ នាព្រឹកថ្ងៃទី៦ ខែមិថុនា ឆ្នាំ២០២៤ លោកជំទាវ ពុំ ចន្ទីនី និងសការី បានអញ្ជើញជួបសំណេះសំណាល និងចែកអំណោយជូនលោកគ្រូ អ្នកគ្រូ និងនិស្សិតចំនួន ៤៤១នាក់ ដែលមានជីវភាពខ្វះខាត នៅទីស្នាក់ការកណ្តាលកាកបាទក្រហមកម្ពុជា។
ក្នុងឱកាសនេះ លោកជំទាវអគ្គលេខាធិការកាកបាទក្រហមកម្ពុជា បាននាំប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយក្តីនឹករលឹក។ ជាមួយគ្នានេះ លោកជំទាវ មានប្រសាសន៍ថា “កាកបាទក្រហមកម្ពុជា ធ្វើសកម្មភាពមនុស្សធម៌ស្របតាមគោលការណ៍គ្រឹះរបស់ចលនាអន្តរជាតិ កាកបាទក្រហម និងអឌ្ឍចន្ទក្រហម ហើយកាកបាទក្រហមកម្ពុជា គឺជាជំនួយការអាជ្ញាធរសារណៈក្នុងវិស័យមនុស្សធម៌”។
លោកជំទាវ បានបន្តថា “កាកបាទក្រហមកម្ពុជា បានរៀបចំការកៀគររកមូលនិធិ ក្នុងឱកាស ខួបទី១៦១ ទិវាភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៤ ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ”។ កាកបាទក្រហមកម្ពុជា បានលើកប្រធានបទនេះឡើងព្រោះ បច្ចុប្បន្ននេះបញ្ហាសុខភាពរបស់ប្រជាជនកម្ពុជា មានការកើនឡើងជាពិសេសជំងឺមិនឆ្លងទាំង៤ធំគឺ ជំងឺទឹកនោមផ្អែម ជំងឺមហារីក ជំងឺសសៃឈាមបេះដូង និងជំងឺរលាកផ្លូវដង្ហើមរុំារ៉ៃ ហើយការប្រែប្រួលអាសកាសធាតុ កាកបាទក្រហមកម្ពុជា បានចុះអប់រំផ្សព្វផ្សាយ និងធ្វើសកម្មភាពដាំដើមឈើ ទាំងទីស្នាក់ការកណ្តាល សាខាកាកបាទក្រហមកម្ពុជា រាជធានី និងខេត្តទាំង២៤ ទន្ទឹមនឹងនេះ លោកជំទាវ ពុំ ចន្ទីនី បានអំពាវនាវដល់បងប្អូនប្រជាពលរដ្ឋ ចូលរួមដាំដើមឈើ យ៉ាងហោចណាស់១នាក់ដាំបាន១ដើម”។
អំណោយចែកជូនលោកគ្រូ អ្នកគ្រូ និងនិស្សិត ក្នុងម្នាក់ៗទទួលបាន ៖ អង្ករ២៥គីឡូក្រាម មី១កេស ត្រីខ១០កំប៉ុង ទឹកស៊ីអ៊ីវ១យួរ ឃីត១(សារុង មុង ភួយ និងក្រមា) និងថវិកាមួយចំនួន៕
