ឯកឧត្តម អឿង ចន្ថា អនុរដ្ឋលេខាធិការក្រសួងធនធានទឹក ទទួលជួបប្រជុំជាមួយតំណាងការិយាល័យទឹកអន្តរជាតិ ដើម្បីពិភាក្សាកិច្ចការងារទាក់ទងនឹងការគ្រប់គ្រងអាងទន្លេ

ភ្នំពេញ៖ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការនៃក្រសួងធនធានទឹក និងឧតុនិយម និងជាប្រធានលេខាធិការដ្ឋាននៃគណៈកម្មាធិការជាតិគ្រប់គ្រងអាងទន្លេ បានទទួលជួបប្រជុំជាមួយតំណាងការិយាល័យទឹកអន្តរជាតិ(OiEau) របស់ប្រទេសបារាំង ដើម្បីពិភាក្សាកិច្ចការងារទាក់ទងនឹងការគ្រប់គ្រងអាងទន្លេ។

ឯកឧត្តមអនុរដ្ឋលេខាធិការ បានបញ្ជាក់ថា ជំនួបពិភាក្សាការងារពេលនេះ មានគោលបំណងដើម្បីបង្ហាញពីសកម្មភាពការងារដែលកំពុងដំណើរការ ដើម្បីស្វែងយល់ពីផែនការយុទ្ធសាស្ត្ររបស់លេខាធិការដ្ឋាន និងដើម្បីទទួលបានអនុសាសន៍បន្ថែមពីលេខាធិការដ្ឋានទៅលើនីតិវិធីក្នុងការបង្កើតគណៈកម្មាធិការគ្រប់គ្រងអាងទន្លេថ្នាក់ក្រោមជាតិ ជាពិសេសការបង្កើតគណៈកម្មាធិការគ្រប់គ្រងអាងស្ទឹងសង្កែ។

ជាលទ្ធផល កិច្ចប្រជុំសម្រេចបានចំណុចសំខាន់ៗចំនួន០៤ រួមមាន៖

១).ចែករំលែកបទពិសោធន៍ដែលទទួលបានក្នុងប្រទេសកម្ពុជា ជាផ្នែកនៃគម្រោងគ្រប់គ្រងធនធានទឹកចម្រុះ ដែលបានអនុវត្តជាមួយដៃគូកម្ពុជា ដូចជា អាងស្ទឹងសែន អាងស្ទឹងសង្កែ ជាដើម។

២).ផ្លាស់ប្តូរបទពិសោធន៍ជាមួយប្រទេសបារាំង រួមទាំងគណៈកម្មាធិការជាតិទឹក ដែលមានចំណុចដូចគ្នាជាមួយគណៈកម្មាការជាតិគ្រប់គ្រងអាងទន្លេ និងប្រទេសជាច្រើនដែលការិយាល័យទឹកអន្តរជាតិបានអនុវត្តសកម្មភាពគាំទ្រការគ្រប់គ្រងអាងទន្លេ។

៣).គាំទ្រសកម្មភាពរបស់លេខាធិការដ្ឋានលើនិយមន័យនៃការងាររយៈពេលខ្លីនិងវែង ដោយផ្អែកលើតម្រូវការដែលបានកំណត់ និងការអនុវត្តយុទ្ធសាស្ត្រកសាងសមត្ថភាព។

៤).ផលិតឧបករណ៍ទំនាក់ទំនង និងខ្លឹមសារ ដើម្បីផ្សព្វផ្សាយការគ្រប់គ្រងអាងទន្លេនៅទូទាំងប្រទេសកម្ពុជា និងជាមួយម្ចាស់ជំនួយ។

គួរបញ្ជាក់ផងដែរ លេខាធិការដ្ឋាននៃគណៈកម្មាធិការជាតិគ្រប់គ្រងអាងទន្លេនឹងបន្តជំរុញការងារគ្រប់គ្រងអាងទន្លេឱ្យបានបោះជំហានទៅមុខប្រកបដោយផ្លែផ្កា ដោយនឹងជួយជំរុញឱ្យមានការបង្កើតគណៈកម្មាធិការគ្រប់គ្រងអាងទន្លេថ្នាក់ក្រោមជាតិ ដែលជាសេនាធិការធ្វើការងារផ្ទាល់ជាមួយរដ្ឋបាលថ្នាក់ក្រោមជាតិលើកិច្ចការគ្រប់គ្រងអាងទន្លេ ដើម្បីជួយគាំទ្រដល់គណៈកម្មាធិការជាតិគ្រប់គ្រងអាងទន្លេ ៕