កម្លាំងនគរបាលខេត្តកំពង់ធំ បង្ក្រាបក្មេងទំនើង ០១ក្រុម បន្ទាប់ធ្វើសកម្មភាពជិះម៉ូតូជាន់ជន្ទុល តាមបណ្តោយផ្លូវក្រាលកៅស៊ូ បង្ករឲ្យមានបែកផ្កាភ្លើង និងមានសំឡេងរំខានដល់ពលរដ្ឋ
ភ្នំពេញ៖ ដោយអនុវត្តតាមបទបញ្ជា របស់ប្រមុខថ្នាក់ដឹកនាំ នៃព្រះរាជាណាចក្រកម្ពុជា ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ បានដាក់ចេញនូវផែនការយ៉ាងតឹងរ៉ឹងបំផុត ដល់ថ្នាក់ដឹកនាំតាមបណ្តាផែនការងារជំនាញ និងអធិការដ្ឋាននគរបាលទាំង០៩ ក្រុង-ស្រុក ក៏ដូចជាប៉ុស្តិ៍នគរបាលរដ្ឋបាល ទាំង៨១ ឃុំ-សង្កាត់ ត្រូវអនុវត្តវិធានការជំនាញ បង្ក្រាបឲ្យមានប្រសិទ្ធភាពខ្ពស់ ចំពោះបទល្មើសនានា ជាពិសេសបទល្មើស ដែលបង្ករឡើងដោយក្មេងទំនើង ដើម្បីធានា រក្សាបាន សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
ជាក់ស្ដែងនៅវេលាម៉ោង២០និង៣០នាទីយប់ថ្ងៃទី០៧ ខែមិថុនា ឆ្នាំ២០២៤ កម្លាំងនគរបាល នៃអធិការដ្ឋាននគរបាលក្រុងស្ទឹងសែន ដឹកនាំលោកវរសេនីយ៍ឯក គឹម សុខមករា អធិការនគរបាលក្រុង បានចេញអន្តរាគមន៍ ឃាត់ខ្លួនក្មេងទំនើងចំនួន ០១ក្រុម បន្ទាប់ធ្វើសកម្មភាពជិះម៉ូតូជាន់ជន្ទុល តាមបណ្តោយផ្លូវក្រាលកៅស៊ូ បង្ករឲ្យមានបែកផ្កាភ្លើង និងមានសំឡេងរំខាន ដល់ប្រជាពលរដ្ឋ ស្ថិតក្នុងចំណុចមុខវត្តស្រយ៉ូវជើង សង្កាត់ ស្រយ៉ូវ ក្រុង ស្ទឹងសែន ឃាត់ខ្លួន ក្មេងទំនើង មួយក្រុមមានគ្នា ០៤នាក់៖
១.ឈ្មោះ ភិន ថេង ភេទ ប្រុស អាយុ ១៧ឆ្នាំ មុខរបរ សិស្ស រស់នៅភូមិពុកយុក សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
២.ឈ្មោះ ម៉ឹង សុធារិទ្ធ ភេទ ប្រុស អាយុ ១៤ឆ្នាំ មុខរបរ សិស្ស រស់នៅភូមិពុកយុក សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
៣.ឈ្មោះ តាន់ ចាន់ថា ភេទ ប្រុស អាយុ ១៤ឆ្នាំ មុខរបរ សិស្ស រស់នៅភូមិរការ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
៤.ឈ្មោះ ព្រឿង ស៉ីវន ភេទ ប្រុស អាយុ ១៤ឆ្នាំ មុខរបរសិស្ស នៅភូមិរកា សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
លោកវរសេនីយ៍ឯក គឹម សុខមករា បានឲ្យដឹងថា ករណីខាងលើនេះ កម្លាំងនគរបាលបាននាំយកវត្ថុតាង និងក្មេងទាំង ០៤នាក់ មកអធិការដ្ឋាននគរបាលក្រុងដើម្បីធ្វើកិច្ចសន្យា អប់រំឲ្យបញ្ឈប់អំពើ ដែលសង្គមស្អប់ខ្ពើមនានានិងប្រគល់ជូនអាណាព្យាបាលវិលត្រលប់ទៅផ្ទះវិញ នារសៀលថ្ងៃទី០៨ ខែមិថុនា ឆ្នាំ២០២៤ ៕
