អំណោយសម្តេចធិបតី និងលោកជំទាវបណ្ឌិត ត្រូវបានផ្តល់ជូនកម្លាំងតំបន់ប្រតិបត្តិការសឹករងបាត់ដំបង ដែលកំពុងឈរជើងការពារទប់ស្កាត់ បង្ក្រាបការកាប់ទន្ទ្រានដីព្រៃ នៅក្នុងភូមិសាស្ត្រខេត្តបាត់ដំបង

ភ្នំពេញ៖ លោកឧត្តមសេនីយ៍ត្រី ភើយ លំអង មេបញ្ជាការ តំបន់ប្រតិបត្តិការសឹករងបាត់ដំបង នាថ្ងៃទី១៤ ខែមិថុនា ឆ្នាំ២០២៤ បានអមដំណើរលោកឧត្ដមសេនីយ៍ត្រី ឈៀវ ឃុន នាយសេនាធិការរង យោធភូមិភាគទី៥ និងជាមេបញ្ជាការទិសទី៣សំឡូត អញ្ជើញចុះសួរសុខទុក្ខ និងនាំយកសម្ភារៈបំពាក់ គ្រឿងឧបភោគ បរិភោគ ជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ផ្តល់ជូនដល់កម្លាំងតំបន់ប្រតិបត្តិការសឹករង បាត់ដំបង ដែលកំពុងបំពេញបេសកកម្ម ទប់ស្កាត់ បង្ក្រាបបទល្មើសទន្ទ្រានយកដីរដ្ឋ និងការកាប់បំផ្លាញព្រៃឈើ ធនធានធម្មជាតិក្នុងតំបន់អភិរក្សក្នុងភូមិសាស្ត្រខេត្តបាត់ដំបង។

ថ្លែងក្នុងឱកាសនោះដែរលោកឧត្តមសេនីយ៍ត្រី មេបញ្ជាការ ក៏បានណែនាំដល់កងកម្លាំងទាំងអស់ត្រូវយកចិត្តទុកដាក់អនុវត្តឱ្យបានម៉ឺងម៉ាត់នូវបទបញ្ជារបស់សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាល ក្នុងការទប់ស្កាត់ ការពារ និងបង្ក្រាបឱ្យបានទាន់ពេលវេលាដោយមិនឱ្យមានការកាប់បំផ្លាញព្រៃឈើ ធនធានធម្មជាតិបន្តទៀតឡើយ និងត្រូវចាត់ការតាមវិធានការផ្លូវច្បាប់ចំពោះជនទាំងឡាយណាដែលប្រើឧបាយកលបំផ្លិចបំផ្លាញព្រៃឈើធម្មជាតិ និងតំបន់អភិរក្សធនធានធម្មជាតិរបស់រដ្ឋ៕