ចិន រៀបចំសិក្ខាសាលា និងវគ្គបណ្តុះបណ្តាលសម្រាប់មន្ត្រី នៅប្រទេសតំបន់អាហ្វ្រិក និងអាមេរិកឡាទីន ក្នុងគោលបំណងលើកកម្ពស់ប្រព័ន្ធឯកបក្សរបស់ខ្លួន

ប៉េកាំង៖ របាយការណ៍មួយបង្ហាញថា ប្រទេសចិនបានរៀបចំសិក្ខាសាលា និងវគ្គបណ្តុះបណ្តាលសម្រាប់មន្ត្រីនៅក្នុងប្រទេសតំបន់អាហ្វ្រិក និងអាម៉េរិកឡាទីន ក្នុងគោលបំណងលើកកម្ពស់ប្រព័ន្ធឯកបក្សរបស់ខ្លួន និងទស្សនៈពិភពលោករបស់លោកប្រធានាធិបតី ស៊ី ជីនពីង។

សសរស្តម្ភកណ្តាលនៃការគ្រប់គ្រងរបស់លោក ស៊ី គឺគំនិតផ្តួចផ្តើមខ្សែក្រវាត់ និងផ្លូវ (BRI) ដែលជាគម្រោងហេដ្ឋារចនាសម្ព័ន្ធដ៏ធំដែលប្រទេសចិនប្រើប្រាស់ដើម្បីពង្រីកឥទ្ធិពលរបស់ខ្លួននៅក្រៅប្រទេសតាមរយៈការផ្ដល់ប្រាក់កម្ចីដ៏ច្រើនដល់ប្រទេសកំពុងអភិវឌ្ឍ។ របាយការណ៍ដែលបានចេញផ្សាយកាលពីថ្ងៃព្រហស្បតិ៍ទី ១៣ ខែមិថុនា ដោយវិទ្យាស្ថានដែលមានមូលដ្ឋាននៅរដ្ឋធានីវ៉ាស៊ីនតោនរៀបរាប់លម្អិតអំពីកិច្ចខិតខំប្រឹងប្រែងដើម្បីលើកកម្ពស់ការគ្រប់គ្រងដោយបក្សតែមួយ និងការគិតរបស់លោក ស៊ី ទៅកាន់ដៃគូ BRI នៅក្នុងផ្នែកខ្លះនៃទ្វីបអាហ្រ្វិក អាម៉េរិកឡាទីន។

របាយការណ៍របស់ក្រុមប្រឹក្សាអាត្លង់ទិក (Atlantic Council) បានគូសបញ្ជាក់យ៉ាងច្បាស់នូវទិដ្ឋភាពនៃគំរូផ្តាច់ការរបស់ប្រទេសចិន ដែលជាចំណុចកណ្តាលនៃផែនការនៃការអភិវឌ្ឍប្រកបដោយជោគជ័យ ដែលប្រទេសដទៃអាចធ្វើត្រាប់តាម។ យោងតាមឯកសារនេះ ក្នុងចំណោមគំនិតផ្តួចផ្តើមដែលបានរាយបញ្ជីគឺសិក្ខាសាលាដែលធ្វើឡើងតាមអ៊ីនធឺណិតសម្រាប់ទីប្រឹក្សាប្រធានាធិបតី និងមន្ត្រីថ្នាក់គណៈរដ្ឋមន្ត្រីនៅក្នុងប្រទេសកំពុងអភិវឌ្ឍ គោលបំណងពង្រីកឥទ្ធិពលអន្តរជាតិនៃប្រព័ន្ធអភិបាលកិច្ចរបស់ប្រទេសចិន។

យោងតាមឯកសាររបស់ក្រសួងដែលដកស្រង់ដោយរបាយការណ៍ សិក្ខាសាលាដែលបានធ្វើឡើងនៅខែមិថុនា ឆ្នាំ ២០២១ ព្យាយាមផ្សព្វផ្សាយគំនិតរបស់លោកប្រធានាធិបតី ស៊ី ជីនពីង លើអភិបាលកិច្ចជាតិ ប្រព័ន្ធនយោបាយបច្ចុប្បន្នរបស់ប្រទេសចិន ជីវិតនយោបាយ និងលក្ខណៈពិសេសនៃដំណើរការធ្វើសេចក្តីសម្រេចចិត្តសម្រាប់គោលនយោបាយជាមូលដ្ឋាន។ រដ្ឋាភិបាលរដ្ឋធានីប៉េកាំងក៏បានលើកកម្ពស់កិច្ចខិតខំប្រឹងប្រែងរបស់ប្រទេសចិននៅការចល័ត និងការគ្រប់គ្រងសង្គម ក្នុងអំឡុងពេលជំងឺរាតត្បាតកូវីដ ១៩។ កម្មវិធីហ្វឹកហ្វឺនមួយផ្សេងទៀត សំដៅដល់មន្ត្រីអាហ្រ្វិក ដែលពាក់ព័ន្ធនឹងការធ្វើផែនការទីក្រុង ផ្តោតលើប្រព័ន្ធឃ្លាំមើលដែលកាន់តែតឹងរឹងរបស់ប្រទេសចិន។
ចិនគឺជាសង្គមមួយក្នុងចំណោមសង្គមដែលមានប្រព័ន្ធឃ្លាំមើលតឹងរឹងបំផុតរបស់ពិភពលោក ហើយអ្នករិះគន់លើកឡើងថា បច្ចេកវិទ្យាសម្គាល់មុខត្រូវបានប្រើប្រាស់យ៉ាងទូលំទូលាយចាប់ពីការអនុវត្តច្បាប់ប្រចាំថ្ងៃរហូតដល់ការគាបសង្កត់ផ្នែកនយោបាយ៕