ឧត្តមសេនីយ៍ទោ មៀច សាមុត ចុះសួរសុខទុក្ខកម្លាំងវរសេនាតូចអន្តរាគមន៍២៨១ ដែលត្រូវចេញសហការ ការពារ ទប់ស្កាត់ បង្ក្រាបការកាប់ទន្ទ្រានដីព្រៃនៅក្នុងភូមិសាស្ត្រ ខេត្តមណ្ឌលគិរី

ភ្នំពេញ៖ កាលពីរសៀលថ្ងៃទី១៦ ខែមិថុនា ឆ្នាំ២០២៤ ឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ អញ្ជើញចុះសួរសុខទុក្ខ និងនាំយកថវិកាបំប៉ន សម្ភារបំពាក់ គ្រឿងឧបភោគ បរិភោគ ប្រេងឥន្ធនៈ មួយចំនួនជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ផ្តល់ជូនដល់កម្លាំងវរសេនាតូចអន្តរាគមន៍២៨១ កងពលតូចអន្តរាគមន៍លេខ១២៨ ដែលត្រូវចេញបំពេញបេសកកម្ម សហការ ការពារ ទប់ស្កាត់ បង្ក្រាបបទល្មើសទន្ទ្រានយកដីរដ្ឋ និងការកាប់បំផ្លាញព្រៃឈើ ធនធានធម្មជាតិក្នុងតំបន់អភិរក្សក្នុងភូមិសាស្ត្រខេត្តមណ្ឌលគិរី តាមបទបញ្ជា របស់យោធភូមិភាគទី១ ។

ថ្លែងក្នុងឱកាសនោះដែរលោកឧត្តមសេនីយ៍ទោ មេបញ្ជាការ ក៏បានណែនាំដល់កងកម្លាំងទាំងអស់ត្រូវយកចិត្តទុកដាក់អនុវត្តឱ្យបានម៉ឺងម៉ាត់នូវបទបញ្ជារបស់សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាល ក្នុងការទប់ស្កាត់ ការពារ និងបង្ក្រាបឱ្យបានទាន់ពេលវេលាដោយមិនឱ្យមានការកាប់បំផ្លាញព្រៃឈើ ធនធានធម្មជាតិបន្តទៀតឡើយ និងត្រូវចាត់ការតាមវិធានការផ្លូវច្បាប់ចំពោះជនទាំងឡាយណាដែលប្រើឧបាយកលបំផ្លិចបំផ្លាញព្រៃឈើធម្មជាតិ និងតំបន់អភិរក្សធនធានធម្មជាតិរបស់រដ្ឋ។

ឆ្លៀតក្នុងឱកាសនោះ លោកឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ និងភរិយា ក៏បានឧបត្ថម្ភថវិកាបំប៉នបន្ថែម ជូនដល់កម្លាំងវរសេនាតូចអន្តរាគមន៍២៨១ កងពលតូចអន្តរាគមន៍លេខ១២៨ មួយចំនួនផងដែរ៕