ឯកឧត្តម សួស ប្រាថ្នា លើកឡើងពីសកម្មភាព ជាអាទិភាពដែលអគ្គនាយកដ្ឋានរដ្ឋបាល នឹងបន្តអនុវត្ត

ភ្នំពេញ៖ ក្នុងសន្និសីទសារព័ត៌មាន រៀបចំដោយក្រុមអ្នកនាំពាក្យក្រសួងមហាផ្ទៃ លើប្រធានបទប្រធានបទ «ការផ្តល់សេវាតាមយន្តការច្រកចេញចូលតែមួយ» កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ បានលើកឡើងពីសកម្មភាព ជាអាទិភាពដែលអគ្គនាយកដ្ឋានរដ្ឋបាលនឹងបន្តអនុវត្ត ។

ក្នុងសន្និសីទនោះដែរឯកឧត្ដម សួស ប្រាថ្នា បានមានប្រសាសន៍ថា ពាក់ព័ន្ធនឹងកិច្ចដំណើរការនៃការផ្តល់សេវារដ្ឋបាលតាមយន្តការច្រកចេញចូលតែមួយ អគ្គនាយកដ្ឋានរដ្ឋបាល នឹងបន្តនិរន្តរភាពលើសមិទ្ធផល ដែលបានសម្រេចនាពេលកន្លង មក និងត្រៀមអនុវត្តការងារមួយចំនួនបន្ថែមទៀត ក្នុងគោលដៅកែលម្អ និងធ្វើឱ្យប្រសើរ ឡើងការផ្តល់សេវារដ្ឋបាលជូនប្រជាពលរដ្ឋតាមយន្តការច្រកចេញចូលតែមួយ។

សកម្មភាព ជាអាទិភាពដែលអគ្គនាយកដ្ឋានរដ្ឋបាលនឹងបន្តអនុវត្តរួមមានដូចខាងក្រោម៖
-បន្តពិភាក្សាជាមួយក្រសួង ស្ថាប័នពាក់ព័ន្ធ ដើម្បីកែសម្រួលបែបបទ និងនីតិវិធី បច្ចេកទេសនៃការផ្តល់សេវារដ្ឋបាលតាមវិស័យជំនាញឱ្យកាន់តែល្អប្រសើរឡើង មានលក្ខណៈសាមញ្ញ និងងាយស្រួល

-ដាក់ឱ្យអនុវត្តជាផ្លូវការការដាក់ពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញ លើគ្រប់ប្រភេទសេវានៅអង្គភាពច្រកចេញចូលតែមួយនៃរដ្ឋបាលរាជធានី ខេត្ត

-ដាក់ឱ្យប្រើប្រាស់កម្មវិធីព័ត៌មានវិទ្យាសម្រាប់គ្រប់គ្រង និងផ្តល់សេវានៅការិយាល័យ ច្រកចេញចូលតែមួយនៃរដ្ឋបាលក្រុង ស្រុក ខណ្ឌ និងដាក់ឱ្យអនុវត្តការដាក់ពាក្យ ស្នើសុំ និងផ្តល់សេវារដ្ឋបាលតាមប្រព័ន្ធអនឡាញសម្រាប់ប្រភេទសេវាមួយចំនួន នៅការិយាល័យច្រកចេញចូលតែមួយ

-ធ្វើសន្ធានកម្មទិន្នន័យរវាងប្រព័ន្ធកម្មវិធីព័ត៌មានវិទ្យាសម្រាប់គ្រប់គ្រង និងផ្តល់ សេវារដ្ឋបាលនៅរដ្ឋបាលថ្នាក់ក្រោមជាតិជាមួយប្រព័ន្ធព័ត៌មានវិទ្យារបស់ក្រសួង ស្ថាប័នពាក់ព័ន្ធ។

ឯកឧត្ដមអគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ គូសបញ្ជាក់ថា ការអនុវត្តសកម្មភាពជាអាទិភាពខាងលើ គឺជាទម្រង់ដ៏មានសារៈសំខាន់ក្នុងដំណើរឆ្ពោះទៅរកការកសាងរដ្ឋាភិបាលឌីជីថល ដូចបានកំណត់ក្នុងគោលនយោបាយរដ្ឋាភិបាលឌីជីថលឆ្នាំ២០២២-២០៣៥ ដែលមានគោលដៅក្នុងការធ្វើឱ្យប្រសើរឡើងនូវប្រព័ន្ធតភ្ជាប់ព័ត៌មានវិទ្យាឌីជីថល រវាងក្រសួង ស្ថាប័ន និងរដ្ឋបាលថ្នាក់ក្រោមជាតិក្នុងការលើកកម្ពស់ប្រសិទ្ធភាព សមភាព គុណភាព និងតម្លាភាពនៃការបម្រើសេវាសាធារណៈជូនប្រជាពលរដ្ឋ ៕