ឯកឧត្តម សួស ប្រាថ្នា លើកឡើងពីជន្ទល់ធំៗទាំង៣ នៃការធានានិរន្តរភាព ប្រសិទ្ធភាព និងភាពរីកចម្រើននៃយន្តការច្រកចេញចូលតែមួយ

ភ្នំពេញ៖ នៅចុងបញ្ចប់នៃសន្និសីទសារព័ត៌មាន ស្ដីពីការអនុវត្តយន្តការច្រកចេញចូលតែមួយ រៀបចំដោយក្រុមអ្នកនាំពាក្យក្រសួងមហាផ្ទៃ កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ បានមានប្រសាសន៍ថា ដើម្បីឱ្យយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិអាចអនុវត្តការងារ បានដោយរលូន និងទទួលបានជោគជ័យ ស្របតាមគោលការណ៍ និងនីតិវិធីជាធរមាន គឺ មានកត្តាគន្លឹះសំខាន់ៗ ឬក៏អាចនិយាយបានថាជន្ទល់ធំៗចំនួន៣។

បើតាមឯកឧត្តម សួស ប្រាថ្នា ដំបូងគេគឺកត្តា ក្រសួង ស្ថាប័នពាក់ព័ន្ធ ដែលគួរតែបន្តផ្តល់កិច្ចសហការគាំទ្រ តាមរយៈការបណ្តុះបណ្តាលនិង ការកសាងសមត្ថភាពដល់ថ្នាក់ដឹកនាំនិងមន្ត្រីជំនាញរបស់រដ្ឋបាលថ្នាក់ក្រោមជាតិ អំពី បែបបទ និងនីតិវិធីបច្ចេកទេស សម្រាប់ការផ្តល់សេវាតាមវិស័យជំនាញនីមួយៗនៅអង្គភាព ច្រកចេញចូលតែមួយ ព្រមទាំងចូលរួមតាមដាន ត្រួតពិនិត្យ និងវាយតម្លៃលើការផ្តល់សេវា ទាំងនេះ សំដៅធានាថា រដ្ឋបាលថ្នាក់ក្រោមជាតិ អាចអនុវត្តបានត្រឹមត្រូវតាមគោលការណ៍ បែបបទ និងនីតិវិធីដែលបានកំណត់ប្រកបដោយប្រសិទ្ធភាព តម្លាភាព គណនេយ្យភាព និងបរិយាបន្ន។

ជន្ទល់ធំបន្ទាប់ គឺមន្ត្រីផ្តល់សេវាតាមយន្តការច្រកចេញចូលតែមួយ ដែលបើតាមឯកឧត្តមអគ្គនាយក គឺត្រូវសិក្សាស្វែងយល់ឱ្យបានច្បាស់លាស់អំពីលិខិតបទដ្ឋានពាក់ព័ន្ធនឹងការផ្តល់ សេវា ដើម្បីធានាប្រសិទ្ធភាពនៃការផ្តល់សេវាជូនប្រជាពលរដ្ឋ និងប្រកបដោយ តម្លាភាព ឆាប់រហ័ស និងឆ្លើយតបតាមតម្រូវការរបស់ប្រជាពលរដ្ឋ ត្រូវផ្តោតការយកចិត្តទុកដាក់លើការរៀបចំទីកន្លែងផ្តល់សេវាឱ្យបានសមស្រប និងត្រូវមានភាពរួសរាយរាក់ទាក់បង្កភាពកក់ក្តៅដល់អ្នកមកទទួលសេវា ព្រមទាំង ត្រូវយកចិត្តទុកដាក់ផ្តល់សេវាជូនប្រជាពលរដ្ឋឱ្យបានឆាប់រហ័ស។

សម្រាប់មន្ត្រីទទួលបន្ទុកអនុវត្តការងារផ្ទាល់ ការពង្រឹងក្រមសីលធម៌វិជ្ជាជីវៈ ការទទួលខុសត្រូវ និងភាពស្អាតស្អំ ក្នុងការបម្រើ និងផ្តល់សេវាសាធារណៈជូនប្រជាពលរដ្ឋឱ្យបានល្អប្រសើរ ក៏ជារឿងចំបាច់ដែរ។ ក្នុងន័យនេះ ឯកឧត្តម សួស ប្រាថ្នា បានគូសបញ្ជាក់ថាមន្ត្រី ត្រូវខិតខំកសាងនិងអភិវឌ្ឍសមត្ថភាពរបស់ខ្លួនក្នុងការចូលរួមប្រើប្រាស់កម្មវិធី ព័ត៌មានវិទ្យាសម្រាប់គ្រប់គ្រង និងការផ្តល់សេវាតាមប្រព័ន្ធអនឡាញនៅគ្រប់អង្គ ភាពច្រកចេញចូលតែមួយរាជធានី ខេត្ត ដែលក្រសួងមហាផ្ទៃគ្រោងនឹងដាក់ឱ្យ អនុវត្តជាផ្លូវការនាពេលខាងមុខ។

ចំណែកជន្ទល់ធំទី៣ ឬកត្តាគន្លឹះចុងក្រោយគេវិញ គឺប្រជាពលរដ្ឋ។ សម្រាប់ប្រជាពលរដ្ឋ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល បានលើកទឹកចិត្តយ៉ាងទទួច សុំឱ្យមកស្នើសុំសេវាដោយផ្ទាល់នៅអង្គភាព ឬការិយាល័យច្រកចេញចូល តែមួយ ដើម្បីស្វែងយល់ពីការផ្តល់សេវាដោយផ្ទាល់ ចៀសវាងការពឹងពាក់អ្នករត់ការ ដែលធ្វើឱ្យប្រជាពលរដ្ឋត្រូវខាតបង់ថវិកា ចូលរួមពិនិត្យ តាមដាន វាយតម្លៃ និងផ្តល់យោបល់ត្រលប់ក្នុងន័យស្ថាបនា ដើម្បី កែលម្អយន្តការផ្តល់សេវានេះឱ្យកាន់តែល្អប្រសើរបន្ថែមទៀត។

សូមបញ្ជាក់ថា យន្តការច្រកចេញចូលតែមួយ គឺជាកន្លែងប្រមូលផ្តុំការផ្តល់សេវារដ្ឋបាលនានាដែលស្ថិត ក្នុងដែនសមត្ថកិច្ចរបស់ខ្លួន និងផ្តល់លទ្ធផលសម្រេចនៅកន្លែងតែមួយ តាមនីតិវិធីសាមញ្ញ ប្រកបដោយគុណភាព តម្លាភាព ប្រសិទ្ធភាព ស័ក្តិសិទ្ធិភាព គណនេយ្យភាព និងបរិយាបន្ន ឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋាន។ យន្តការនេះត្រូវបានក្លាយជាមធ្យោបាយបម្រើសេចក្ដីត្រូវការជូនប្រជាពលរដ្ឋយ៉ាងមានប្រជាប្រិយភាព ដ្បិតពលរដ្ឋអាចស្នើសុំសេវាផ្សេងៗដោយគ្រាន់តែមកកន្លែងតែមួយ ចំណាយពេលតិច គ្មានអំពើពុករលួយ និងប្រកបដោយគុណភាព៕