ស្នងការដ្ឋាននគរបាលខេត្តតាកែវ បើកសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០២៣ និងបណ្តាឆ្នាំពាក់ព័ន្ធ
ភ្នំពេញ៖ នៅព្រឹកថ្ងៃពុធ ១៣កើត ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩ ខែមិថុនា ឆ្នាំ២០២៤ ស្នងការដ្ឋាននគរបាលខេត្តតាកែវ បានបើកសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០២៣ និងបណ្តាឆ្នាំពាក់ព័ន្ធ ក្រោមអធិបតីភាពឯកឧត្តម ឧត្តមសេនីយ៍ឯក សុខ សារ៉េត អគ្គនាយករង នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ និងលោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ និងមានការអញ្ជើញចូលរួមពី លោកឧត្តមសេនីយ៍ វរសេនីយ៍ ប្រតិភូអមដំណើរ លោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយការិយាល័យជំនាញទាំង៣២ លោកមេបញ្ជាការវរសេនាតូចនគរបាលការពារព្រំដែនគោកលេខ៦០៣ លោកអធិការនគរបាលក្រុង ស្រុក លោកនាយប៉ុស្តិ៍នគរបាលច្រកទ្វារទ្វេភាគីកំពង់ក្រសាំង លោកនាយប៉ុស្តិ៍ការពារព្រំដែនទាំង១១ប៉ុស្តិ៍ លោកនាយប៉ុស្តិ៍នគរបាលរដ្ឋបាលឃុំសង្កាត់ទាំង១០០ប៉ុស្តិ៍ និងមន្រ្តីពាក់ព័ន្ធសរុបចំនួន ១៨២នាក់ ស្រី ១នាក់។
បន្ទាប់មកលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត បានឡើងអានរបាយការណ៍ស្វាគមន៍ និងបូកសរុបលទ្ធផលប្រតិបត្តិការ និងផែនការណ៍អនុវត្តបន្ត។ ទន្ទឹមគ្នានោះលោកឧត្តមសេនីយ៍ទោ ស្នងការ ធ្វើការណែនាំដល់អស់លោក លោកស្រី ដែលបានចូលរួមសូមត្រង់ត្រាប់ស្ដាប់ និងកត់ត្រានូវអនុសាសន៍ និងបទពិសោធន៍ដ៏មានតម្លៃរបស់ឯកឧត្តមគណៈអធិបតី ដើម្បីជាត្រីវិស័យសម្រាប់យកទៅអនុវត្តបន្តតាមតួនាទីភារកិច្ចដែលថ្នាក់ដឹកនាំប្រគល់ជូនឲ្យទទួលបានលទ្ធផលល្អសម្រេចបានជោគជ័យថ្មីបន្ថែមទៀត។
មានប្រសាសន៍ណែនាំផ្តាំផ្ញើពីសំណាក់ឯកឧត្តម ឧត្តមសេនីយ៍ឯក សុខ សារ៉េត អគ្គនាយករង នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ បានថ្លែងនូវអំណរគុណយ៉ាងជ្រាលជ្រៅដល់លោកឧត្តមសេនីយ៍ទោ ស្នងការនគរបាលខេត្ត ដែលតែងមានកិច្ចសហការល្អជាមួយក្រុមការងារកន្លងមក ក្នុងការចុះមកធ្វើសវនកម្មផ្ទៃក្នុង នៅស្នងការដ្ឋាននគរបាលខេត្ត ក៏ដូចជាតាមបណ្តាអធិការដ្ឋាននគរបាល ស្រុក ក្រុងទាំង១០ វរសេនាតូចនគរបាលការពារព្រំដែនគោក និងបានធ្វើសេចក្តីរាយការណ៍យ៉ាងក្បោះក្បាយទាំងកិច្ចការងារសន្តិសុខ សណ្តាប់ធ្នាប់សាធារណៈ និងកិច្ចការងារភូមិ ឃុំ សង្កាត់ មានសុវត្ថិភាពយ៉ាងល្អប្រសើរ។
ឯកឧត្តម ឧត្តមសេនីយ៍ឯក បានបញ្ជាក់ថា ទាក់ទងនិងការងារភូមិឃុំ សង្កាត់ មានសុវត្ថិភាព ស្នងការដ្ឋាននគរបាលខេត្ត ក៏ដូចជា អធិការដ្ឋាននគរបាលគ្រប់ក្រុង ស្រុក និងប៉ុស្តិ៍នគរបាលរដ្ឋបាលមានតួនាទីយ៉ាងសំខាន់ ដែលប្រមុខរាជរដ្ឋាភិបាល និងថ្នាក់ដឹកនាំក្រសួងមហាផ្ទៃ បានយកចិត្តទុកដាក់អំពីភូមិឃុំ សង្កាត់មានសុវត្ថិភាព ដូច្នេះសូមឲ្យអស់លោកជា អធិការ និងប៉ុស្តិ៍រដ្ឋបាលនគរបាលឃុំសង្កាត់ ទាំងអស់ដែលចំណុះឲ្យស្នងការដ្ឋាននគរបាលខេត្ត យើងនេះត្រូវតែយកចិត្តទុកដាក់អនុវត្តកិច្ចការនេះឲ្យមានប្រសិទ្ធិភាពខ្ពស់។
ឆ្លៀតក្នុងឱកាសនោះ ឯកឧត្តម ឧត្តមសេនីយ៍ឯក សុខ សារ៉េត ក៏បានធ្វើការណែនាំបន្ថែមដល់កងកម្លាំងនគរបាលទាំងអស់ ត្រូវពង្រឹងលើបទវិន័យកងកម្លាំងនគរបាលជាតិថ្មីលេខៈ ៨៧៣ ប្រ.ក និងការចុះបញ្ជីវត្តមាន ត្រូវចេះរក្សាទុកនូវរាល់ឯកសារ ដែលពាក់ព័ន្ធសម្រាប់សវនកម្មឆ្នាំបន្ទាប់ រាល់មន្ត្រីនគរបាលដែលឈឺ ត្រូវមានសំបុត្រពេទ្យត្រឹមត្រូវ ឬមន្ត្រីនគរបាលដែលមានបេសកកម្ម ត្រូវមានឯកសារជាក់លាក់ និងត្រូវលើកទឹកចិត្ត និងតម្លើងឋានន្តរសក្ដិ មុខងារ ឫ ស្នើរប័ណ្ណសរសើរ លិខិតសរសើរដល់មន្ត្រីទាំងឡាយណា ដែលមានស្នាដៃ ឬការងារល្អ ក្នុងការបំពេញតួនាទីភារកិច្ចប្រចាំថ្ងៃ និងកិច្ចប្រតិបត្តិការ ឫរាល់ការចាយវាយ ឬការចំណាយទៅលើអ្វីមួយ ត្រូវតែមានឯកសារ និងវិក័យបត្រគ្រប់គ្រាន់ព្រមទាំងការគ្រប់គ្រងទ្រព្យសម្បត្តិរដ្ឋឲ្យបានល្អផងដែរ ៕
