គណៈកម្មការទី៨នៃរដ្ឋសភា ជំរុញឱ្យភាគីពាក់ព័ន្ធទាំងអស់ក្នុងខេត្តព្រះសីហនុ យកចិត្តទុកដាក់សម្រេចឱ្យបានជោគជ័យនូវគោលនយោបាយបណ្តុះបណ្តាលវិជ្ជាជីវៈរបស់រដ្ឋ ១,៥លាននាក់ដោយឥតគិតថ្លៃ
ភ្នំពេញ៖ នាព្រឹកថ្ងៃទី១៩ ខែមិថុនា ឆ្នាំ២០២៤ លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា បានដឹកនាំគណៈប្រតិភូគណៈកម្មការទី៨ បន្តធ្វើទស្សនកិច្ចសិក្សាស្វែងយល់ពីស្ថានភាពការងារបណ្តុះបណ្តាលវិជ្ជាជីវៈ និងបច្ចេកទេសរបស់វិទ្យាស្ថានពហុបច្ចេកទេសខេត្តព្រះសីហនុ និងវិទ្យាស្ថានពហុបច្ចេកទេសមិត្តភាពកម្ពុជា-ចិន ព្រមទាំងជំរុញបន្ថែមទៀតដល់ថ្នាក់ដឹកនាំ សាស្រ្តាចារ្យ និងភាគីពាក់ព័ន្ធទាំងអស់របស់វិទ្យាស្ថានទាំងពីរ យកចិត្តទុកដាក់រួមគ្នាអនុវត្តន៍ គោលនយោបាយដែលរាជរដ្ឋាភិបាលបានដាក់ចេញ គឺការបណ្តុះបណ្តាលជំនាញវិជ្ជាជីវៈដល់យុវជន១លាន៥សែននាក់ ដែលមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស អោយសម្រេចបានជោគជ័យ ស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជានីតិកាលទី៧។
លោកជំទាវ ឡោក ខេង ចាត់ទុកការបណ្តុះបណ្តាលបច្ចេកទេសជាការងារអាទិភាពឆ្លើយតបនឹងតម្រូវការអភិវឌ្ឍន៍ជាក់ស្តែងរបស់កម្ពុជា ដោយរួមចំណែកបង្កើតឱកាសការងារ, ធានាលំនឹងជីវភាពពលរដ្ឋ កាត់បន្ថយការធ្វើចំណាកស្រុកដោយភាពប្រថុយប្រថានជាដើម។
លោកជំទាវបានបន្តថា ការបណ្តុះបណ្តាលវិជ្ជាជីវៈ ជាពិសេសការបណ្តុះបណ្តាលជំនាញវិជ្ជាជីវៈដល់យុវជន១លាន៥សែននាក់ ដោយឥតបង់ថ្លៃ មានអត្ថប្រយោជន៍ធំធេងណាស់ចំពោះប្រជាពលរដ្ឋ និងសង្គមជាតិដែលគ្រប់ភាគីពាក់ព័ន្ធត្រូវខិតខំរួមគ្នាធ្វើឱ្យសម្រេចបាន។ លោកជំទាវ ប្រធានគណៈកម្មកាទី៨ បានថ្លែងកោតសរសើរ ចំពោះការអនុវត្តការងារបានល្អនាពេលកន្លងមកក្នុងខេត្តព្រះសីហនុ ពិសេសយន្តការចុះធ្វើការអប់រំ កៀរគរយុវជន និងយន្តការជនបង្គោល ក្នុងការសម្របសម្រួលលើកទឹកចិត្តអោយយុវជនបានចុះឈ្មោះចូលរៀនវិជ្ជាជីវៈនៅគ្រប់ទីកន្លែង។ មិនខុសពីវិស័យសុខាភិបាលនោះទេ លោកជំទាវប្រធាន ឯកឧត្តមអនុប្រធាន និងសមាជិកសមាជិកាគណៈកម្មការទាំងអស់ក៏បានស្តាប់ និងទទួលយកសំណូមពរ ក៏ដូចជាបញ្ហាប្រឈមពាក់ព័ន្ធទៅនឹងការងារបណ្តុះបណ្តាលវិជ្ជាជីវៈ ទៅធ្វើការសិក្សា និងពិគ្រោះយោបល់ជាមួយក្រសួងសាមី និងអង្គភាពពាក់ព័ន្ធបន្ថែមទៀត ៕
