ក្រសួងសាធារណការ ជួបបិភាក្សាការងារជាមួយគណៈប្រតិភូស្ថានទូត និងក្រុមហ៊ុនផ្លូវដែកឥណ្ឌូនេស៊ី ដើម្បីពិនិត្យលទ្ធភាពក្នុងការបង្កើតកិច្ចសហការលើការកសាងហេដ្ឋារចនាសម្ព័ន្ធដឹកជញ្ជូនឱ្យមានការរីកចម្រើនថែមទៀត

ភ្នំពេញ៖ កាលពីថ្ងៃទី២១ ខែមិថុនា ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ តំណាង ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយ គណៈប្រតិភូស្ថានទូតប្រទេសឥណ្ឌូនេស៊ី និងក្រុមហ៊ុនផ្លូវដែកប្រទេសឥណ្ឌូនេស៊ី (Kereta Api Indonesia) ដឹកនាំដោយលោកស្រី Lauti Nia Astri ទីប្រឹក្សារដ្ឋមន្ត្រី ដោយមានការចូលរួមផងដែរពីសំណាក់ថ្នាក់ដឹកនាំ និងមន្ត្រីពាក់ព័ន្ធមួយចំនួនទៀត។

ជំនួបពិភាក្សានេះ គឺដើម្បីពិនិត្យលទ្ធភាពក្នុងការបង្កើតកិច្ចសហការរវាងប្រទេសទាំងពីរ កម្ពុជា-ឥណ្ឌូនេស៊ី លើការកសាងហេដ្ឋារចនាសម្ព័ន្ធដឹកជញ្ជូនឱ្យមានការរីកចម្រើនថែមទៀត។ ជម្រាបទៅកាន់គណៈប្រតិភូ លោកជំទាវរដ្ឋលេខាធិការប្រចាំការ បានលើកឡើងពីឱកាសលើការវិនិយោគ ព្រមទាំងសក្តានុពលលើវិស័យហេដ្ឋារចនាសម្ព័ន្ធដឹកជញ្ជូន ផ្លូវ ថ្នល់ ស្ពាន ផ្លូវដែក និងវិស័យកំពង់ផែ នៅកម្ពុជា និង “ផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣” ដែលបើកទូលាយ និងស្វាគមន៍រាល់ការចូលរួមពីគ្រប់ភាគីក្នុងការវិនិយោគ។

គណៈប្រតិភូបានបង្ហាញចំណាប់អារម្មណ៍ចំពោះការអភិវឌ្ឍយ៉ាងឆាប់រហ័សនូវវិស័យហេដ្ឋារចនាសម្ព័ន្ធនៅកម្ពុជា និងបាន ជម្រាបជូនពី ការរៀបចំសន្និសីទ CEO ផ្លូវដែកអាស៊ានលើកទី៤៤ (44th ASEAN Railway CEOs’ Conference) ដែលគ្រោងរៀបចំឡើងនៅក្រុងបានឌុង ប្រទេសឥណ្ឌូនេស៊ី ក្នុងខែកញ្ញាខាងមុខនេះ ដែលជាឱកាសដល់ប្រទេសជាសមាជិកទាំងអស់បានបង្ហាញពីទស្សនវិស័យជារួម ក្នុងការតភ្ជាប់ប្រព័ន្ធដឹកជញ្ជូន ជាពិសេសតាមរយៈផ្លូវដែក និងរួមគ្នាកាត់បន្ថយការបញ្ចេញឧស្ម័នពុលទៅក្នុងបរិយាកាស ដើម្បីធានានិរន្តរភាពបរិស្ថាន៕