អភិបាលខេត្តកំពង់ឆ្នាំង អំពាវនាវដល់បងប្អូនប្រជាពលរដ្ឋចូលរួមដាំដើមឈើឲ្យបានគ្រប់ៗគ្នា និងថែរក្សាព្រៃឈើ ព្រៃលិចទឹកឲ្យបានគង់វង្ស

ភ្នំពេញ៖ នាថ្ងៃទី២៤ ខែមិថុនា ឆ្នាំ២០២៤ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានចូលរួមជាមួយមន្ត្រីរាជការ កងកម្លាំង លោកគ្រូ អ្នកគ្រូ យុវជន ស.ស.យ.ក សិស្សានុសិស្ស និងអង្គការដៃគូ ដាំកូនឈើព្រៃលិចទឹកជាង២ពាន់ដើម លើដីតំបន់៣ ក្នុងភូមិសេះស្លាប់ ឃុំឆ្នុកទ្រូ ស្រុកបរិបូណ៍ លើផ្ទៃដីប្រមាណ១៥០ហិកតា។

ក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្ត បានមានប្រសាសន៍ថា ព្រៃលិចទឹកមានសារៈសំខាន់ខ្លាំងណាស់គឺជាជម្រកត្រីពងកូន ជាប្រភពចំណី និងជម្រករបស់ត្រី ជាជម្រកសត្វស្លាប សត្វល្មូន និងសត្វច្រើនប្រភេទទៀត។ ព្រៃលិចទឹកក៏ជាប្រភពចំណូលសម្រាប់បងប្អូនប្រជាពលរដ្ឋក្នុងតំបន់ និងអាចរៀបចំជាតំបន់ទេសចរណ៍របស់សហគមន៍មូលដ្ឋាន។

ជាមួយគ្នានោះ ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋចូលរួមដាំដើមឈើឲ្យបានគ្រប់ៗគ្នា និងថែរក្សាព្រៃឈើ ព្រៃលិចទឹកឲ្យបានគង់វង្ស ៕