សម្តេចកិត្តិសង្គហបណ្ឌិត ម៉ែន សំអន អញ្ជើញគោរពវិញ្ញាណក្ខន្ធ ឯកឧត្តម ប៊ុន អ៊ុយ

ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រ កម្ពុជា និងជាសមាជិកសភាមណ្ឌលខេត្តស្វាយរៀង បានអញ្ជើញគោរពវិញ្ញាណក្ខន្ធ ឯកឧត្តម ប៊ុន អ៊ុយ ទីប្រឹក្សារាជរដ្ឋាភិបាល នៅវត្តញាណរង្សី ភូមិទូលអំពៅ សង្កាត់ ទួលសង្កែ១ ខណ្ឌ ឬស្សីកែវ រាជធានីភ្នំពេញ នារសៀលថ្ងៃចន្ទ ៣រោច ខែជេស្ឋ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី២៤ ខែមិថុនា ឆ្នាំ២០២៤ ។

ឯកឧត្តម ប៊ុន អ៊ុយ បានទទួលមរណភាព កាលពីរសៀលថ្ងៃសៅរ៍ ១រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹង ថ្ងៃទី២២ ខែមិថុនា ឆ្នាំ២០២៤ វេលាម៉ោង ១៥:៥០នាទី ក្នុងជន្មាយុ ៨១ ឆ្នាំ ដោយជរាពាធ។

នៅក្នុងសមានទុក្ខដ៏ក្រៀមក្រំនេះ សម្តេចកិត្តិសង្គហបណ្ឌិតក៏បានចូលរួមរំលែកមរណទុក្ខ ជាមួយ លោជំទាវ លឹម ស៊ីដេហ្វីន ព្រមទាំងក្រុមគ្រួសារ ចំពោះការបាត់បង់ ឯកឧត្តម ប៊ុន អ៊ុយ ដែលត្រូវជា ស្វាមី ជាឪពុក ជាឪពុកក្មេក ជាជីតា ប្រកបដោយសង្គហធម៌ និងព្រហ្មវិហារធម៌ដ៏ល្អប្រពៃ និងក៏ដូចជាការបាត់បង់ នូវធនធានមនុស្សឆ្នើមមួយរូប ដែលមានស្នាដៃ បទពិសោធន៍ជាច្រើន ក្នុងវិស័យការងារ ប្រកបដោយ សមត្ថភាព និងការទទួលខុសត្រូវខ្ពស់ និងបានបូជាអស់កម្លាំង កាយចិត្ត បញ្ញាស្មារតី ក្នុងការចូលរួម ចំណែកយ៉ាងសកម្មក្នុងការកសាង អភិវឌ្ឍន៍មាតុភូមិកម្ពុជា និងសម្រេចបាននូវកិច្ចការជាច្រើនជូនសង្គម ជាតិ។

សម្តេចកិត្តិសង្គហបណ្ឌិត ក៏បានឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្តម ប៊ុន អ៊ុយ បានទៅសោយសុខ ក្នុងសុគតិភពកុំបីឃ្លៀងឃ្លាតឡើយ៕