ឧបនាយករដ្ឋមន្ត្រី ហង់ជួន ណារ៉ុន អញ្ជើញចូលរួមពិធី ជួបជុំអតីតនិស្សិតនៃមហាវិទ្យាល័យអប់រំ សាកលវិទ្យាល័យជូឡាឡុងកន

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៥ ខែមិថុនា ឆ្នាំ២០២៤ បានអញ្ជើញចូលរួមក្នុងពិធីជួបជុំអតីតនិស្សិតនៃមហាវិទ្យាល័យអប់រំ សាកលវិទ្យាល័យជូឡាឡុងកន (Chulalongkon University) និងមានការចូលរួមពី ឯកឧត្តម Cherdkiat Atthakor ឯកអគ្គរាជទូតថៃប្រចាំព្រះរាជាណាចក្រកម្ពុជា សាស្ត្រាចារ្យជំនួយបណ្ឌិត អនុប្រធានសមាគមអតីតនិស្សិត នៃមហាវិទ្យាល័យអប់រំ សាកលវិទ្យាល័យជូឡាឡុងកន ឯកឧត្តម លោកជំទាវ លោក លោកស្រី ថ្នាក់ដឹកនាំសមាគម និងអតីតនិស្សិតនៃមហាវិទ្យាល័យអប់រំ សាកលវិទ្យាល័យជូឡាឡុងកន សរុបចំនួនប្រមាណ ៥៨នាក់។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណ និងកោតសរសើរចំពោះគំនិតផ្តួចផ្តើមរបស់សមាគមអតីតនិស្សិត នៃមហាវិទ្យាល័យអប់រំ សាកលវិទ្យាល័យជូឡាឡុងកន ដែលបានរៀបចំកម្មវិធីនេះឡើងនៅទីក្រុងភ្នំពេញ។

កម្មវិធីនេះមិនត្រឹមតែជួយឱ្យអតីតនិស្សិតអាចជួបជុំគ្នារំឭកអនុស្សាវរីយ៍អំឡុងពេលសិក្សានៅសាកលវិទ្យាល័យប៉ុណ្ណោះទេ ថែមទាំងបានផ្តល់នូវឱកាសឱ្យអតីតនិស្សិតចែករំលែកបទពិសោធន៍ និងពង្រឹងទំនាក់ទំនងរវាងគ្នា សម្រាប់កិច្ចសហការ ការអភិវឌ្ឍអាជីព និងការងារនាថ្ងៃអនាគត។

ជាងមួយទសវត្សរ៍កន្លងមកនេះ និស្សិតកម្ពុជាមានចំនួនប្រមាណជាង ២៥០០នាក់ បានទៅបន្តការសិក្សានៅតាមគ្រឹះស្ថានសិក្សាឧត្តមសិក្សានានាក្នុងព្រះរាជាណាចក្រថៃឡង់ដ៍ ដែលក្នុងនោះមាននិស្សិតចំនួនប្រមាណ ២១៣២នាក់ បានទទួលអាហារូបករណ៍ព្រះរាជទានដ៏ថ្លៃថ្លារបស់ព្រះអង្គម្ចាស់ក្សត្រី មហាចក្រី សិរិនថន។ គិតត្រឹមដើមឆ្នាំ២០២៤ មាននិស្សិតអាហារូបករណ៍ព្រះរាជទានសិក្សាចាប់ពីថ្នាក់បរិញ្ញាបត្រ រហូតដល់ ថ្នាក់បណ្ឌិត ចំនួនប្រមាណ ១៩០៩នាក់ បានបញ្ចប់ការសិក្សាដោយជោគជ័យ ដែលក្នុងនោះមាននិស្សិតចំនួន ៣៧នាក់បានបញ្ចប់ការសិក្សាពីមហាវិទ្យាល័យអប់រំ សាកលវិទ្យាល័យជូឡាឡុងកន។ បច្ចុប្បន្ន អតីតនិស្សិត នៃមហាវិទ្យាអប់រំ សាកលវិទ្យាល័យជូឡាឡុងកនបានចូលរួមចំណែកយ៉ាងសកម្មក្នុងការអភិវឌ្ឍវិស័យអប់រំនៅកម្ពុជា ដោយពួកគេបានត្រឡប់មកបំពេញការងារនៅតាមអង្គភាពផ្សេងៗក្នុងប្រទេសកម្ពុជា ជាពិសេសបម្រើការងារក្នុងក្រសួងអប់រំ យុវជន និងកីឡា ក៏ដូចជានៅតាមបណ្តាគ្រឹះស្ថាននានាទូទាំងប្រទេស។

ក្នុងបរិបទបរិវត្តកម្មឌីជីថលដែលសង្គមសេដ្ឋកិច្ចមានការវិវត្តឥតឈប់ឈរ ចំណេះដឹង បទពិសោធន៍របស់អតីតនិស្សិតដែលទទួលបានពីសាកលវិទ្យាល័យ គឺជាមូលដ្ឋានគ្រឹះដ៏រឹងមាំសម្រាប់អនុវត្តការងារ និងបន្តការសិក្សាពេញមួយជីវិត ក្នុងគោលដៅ ដើម្បីចូលរួមលើកកម្ពស់ភាពជាពលរដ្ឋជាតិ និងពលរដ្ឋសាកល។ ទំនាក់ទំនងរវាងអតីតនិស្សិតទាំងអស់ នឹងជំរុញឱកាសបង្កើតឱ្យមានកិច្ចសហប្រតិបត្តិ ឈានទៅលើកកម្ពស់នវានុវត្តន៍ ដែលចូលរួមចំណែកជំរុញដល់ការអភិវឌ្ឍសង្គមជាតិបានប្រកបដោយចីរភាព។

ឆ្លៀតឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះមហាវិទ្យាល័យអប់រំ នៃសាកលវិទ្យាល័យជុឡាឡុងកន ជាពិសេសសាស្ត្រាចារ្យ និងបុគ្គលិកអប់រំទាំងអស់ដែលបានផ្តល់ការគាំទ្រទាំងផ្នែកបញ្ញាស្មារតី ក្នុងបុព្វហេតុការរីកចម្រើនរបស់និស្សិតគ្រប់រូប ក៏ដូចជាបានសម្តែងនូវកតញ្ញូតាធម៌យ៉ាងជ្រាលជ្រៅបំផុត ចំពោះព្រះអង្គម្ចាស់ក្សត្រិយ៍មហាចក្រីសិរិនថន ដែលព្រះអង្គបានជួយឧបត្ថម្ភគាំទ្រដល់វិស័យអប់រំនៅកម្ពុជា៕