សម្តេចធិបតី កោតសរសើរអ្នកឧកញ៉ា គិត ម៉េង ដែលតែងតែខិតខំផ្សព្វផ្សាយសក្តានុពលវិនិយោគ និងទាក់ទាញវិនិយោគិនបរទេសមកកម្ពុជា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងនូវការកោតសរសើរដល់អ្នកឧកញ៉ា គិត ម៉េង ដែលតែងតែខិតខំផ្សព្វផ្សាយសក្តានុពលវិនិយោគ និងទាក់ទាញវិនិយោគិនបរទេសមកកម្ពុជា។

ការថ្លែងនូវការកោតសរសើរ បែបនេះរបស់សម្តេចធិបតី ហ៊ុន ម៉ាណែត ធ្វើឡើងក្នុងពិធីសំណេះសំណាល និងពិសាភោជនាហារសាមគ្គីសហគ្រាសធុនតូច មធ្យម និងសិប្បកម្មកម្ពុជា នាល្ងាចថ្ងៃទី២៧ ខែមិថុនា ឆ្នាំ២០២៤នេះ។

ក្នុងឱកាសនោះ សម្តេចធិបតី ហ៊ុន ម៉ាណែត ក៏បានថ្លែងនូវការកោតសរសើរដល់ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាផងដែរ ដែលតែងតែខិតខំទាក់ម៉ូយ (ទាក់ទាញវិនិយោគិន) មកបណ្តាក់ទុកវិនិយោគនៅកម្ពុជា។

ជាមួយគ្នានោះ សម្តេចធិបតី ក៏បានស្នើឲ្យវិស័យឯកជន ជាពិសេសអ្នកឧញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និងឯកឧត្តម ស៊ុន ចាន់ថុល រៀបចំកម្មវិធីបន្ថែមមួយទៀត គឺជំនួបពិភាក្សាផ្ទាល់រវាងបណ្តាវិនិយោគគិតជាតិ និងអន្តរជាតិ ក្នុងឱកាស នៃដំណើរអញ្ជើញរបស់សម្តេចទៅកាន់បណ្តាប្រទេសនានា ដើម្បីទទួលបានបណ្តាវិនិយោគិនកាន់តែច្រើន និងបង្ករលក្ខណៈងាយស្រួលដល់វិនិយោគិនបរទេស។

សូមជំរាបថា កាលពីដើមខែមេសា ឆ្នាំ២០២៤កន្លងទៅ ក្រុមប្រឹក្សាអភិវឌ្ឍន៍កម្ពុជា(CDC) បានចេញផ្សាយរបាយការណ៍ថ្មីមួយស្តីពីការបោះទុនវិនិយោគនៅកម្ពុជា។ តាមរបាយការណ៍ ទុនវិនិយោគបានកើនឡើងជិត ២ពាន់លានដុល្លារក្នុងត្រីមាសទី១ ឆ្នាំ២០២៤។ កំណើននេះត្រូវបានក្រុមប្រឹក្សាអភិវឌ្ឍន៍កម្ពុជាបញ្ជាក់ថា គឺបានពីការវិនិយោគថ្មីនៅក្នុងវិស័យហេដ្ឋារចនាសម្ព័ន្ធ វិស័យឧស្សាហកម្ម វិស័យទេសចរណ៍ និងគម្រោងផលិតកម្មនៃឧស្សាហកម្មក្នុងតំបន់សេដ្ឋកិច្ចពិសេស ៕