អគ្គនាយករង ប.ស.ស. ដឹកនាំកិច្ចប្រជុំត្រួតពិនិត្យលទ្ធផលការងារសម្រេចបានប្រចាំខែ និងទិសដៅអនុវត្តបន្ត របស់នាយកដ្ឋានគ្រប់គ្រង់ថវិកា ហិរញ្ញវត្ថុ និងគណនេយ្យ

ភ្នំពេញ៖ ដោយទទួលបានការអនុញ្ញាតពីសំណាក់ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១ ខែកក្កដា ឆ្នាំ២០២៤នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. បានអញ្ជើញដឹកនាំកិច្ចប្រជុំត្រួតពិនិត្យលទ្ធផលការងារសម្រេចបានប្រចាំខែ របស់នាយកដ្ឋានគ្រប់គ្រង់ថវិកា ហិរញ្ញវត្ថុ និងគណនេយ្យ ដើម្បីពិនិត្យមើលនូវបញ្ហាប្រឈមនានា ក្នុងកំឡុងពេលអនុវត្តការងារកន្លងមក ព្រមទាំងដោះស្រាយបញ្ហាមួយចំនួនជូនដល់ថ្នាក់ដឹកនាំ មន្ត្រី និងបុគ្គលិករបស់នាយកដ្ឋានមួយនេះ ក្នុងន័យរួមចំណែកក្នុងការអនុវត្តការងារឱ្យកាន់តែមានប្រសិទ្ធភាព និងទទួលបានលទ្ធផលខ្ពស់ជូនអង្គភាព។

ឯកឧត្តមបណ្ឌិតអគ្គនាយករង បានមានប្រសាសន៍ថា៖ នាយកដ្ឋានគ្រប់គ្រង់ថវិកា ហិរញ្ញវត្ថុ និងគណនេយ្យ មានតួនាទីសំខាន់ណាស់ ក្នុងការរៀបចំផែនការយុទ្ធសាស្រ្តថវិការបស់អង្គភាព ដោយធ្វើយ៉ាងណាត្រូវក្ដាប់ឱ្យច្បាស់អំពីចំណូលចំណាយ ជាពិសេសត្រូវកាត់បន្ថយចំណាយណាដែលមិនចាំបាច់។

ក្នុងឱកាសនោះផងដែរ ឯកឧត្តមបណ្ឌិតអគ្គនាយករង បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង ពុះពាររាល់ការលំបាកក្នុងការបំពេញការងារបម្រើស្ថាប័ន ដោយក្នុងនោះត្រូវប្រកាន់ខ្ជាប់នូវក្រមសីលធម៌ល្អ ព្រមទាំងខិតខំបន្ថែមទៀតទៅលើការងារដែលសម្រេចបាន ដោយធ្វើយ៉ាងណាឱ្យការអនុវត្តការងារកាន់តែមានប្រសិទ្ធភាព ទទួលបានលទ្ធផលខ្ពស់។

សូមបញ្ជាក់ថា៖ កិច្ចប្រជុំខាងលើនេះ ប្រព្រឹត្តទៅនៅទីស្នាក់ការកណ្តាល ប.ស.ស. រាជធានីភ្នំពេញ ដោយមានវត្តមានចូលរួមពីថ្នាក់ដឹកនាំ មន្រ្តី និងបុគ្គលិកសរុបប្រមាណជាង ៣០រូប៕