ឧត្តមសេនីយ៍ឯក អ៊ួន សារឿន៖ ការងារហ្វឹកហ្វឺនបាន ដើរតួនាទីជាយុទ្ធសាស្ត្រយ៉ាងសំខាន់ក្នុងការពង្រឹងខឿនការពារជាតិ

ភ្នំពេញ៖ ថ្លែងនៅក្នុងពិធីបើកវគ្គហ្វឹកហ្វឺនបំប៉នជំនាញក្រុមបាញ់កាំភ្លើងដៃ កងទ័ពជើងគោក (AARM/32) និងវគ្គបំប៉នជំនាញបាញ់កាំភ្លើងដៃជើងគោក អូស្ត្រាលី (AASAM/22) នាព្រឹកថ្ងៃទី០១ ខែកក្កដា ឆ្នាំ២០២៤ នៅសាលាតេជោសែនជុំគិរី ឯកឧត្តម ឧត្តមសេនីយ៍ឯក អ៊ួន សារឿន មេបញ្ជាការរង កងទ័ពជើងគោក បានមានប្រសាសន៍ថា ការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ក្នុងការពង្រឹងខឿនការពារជាតិ តាមរយៈការផ្តល់នូវចំណេះដឹង ចំណេះធ្វើដល់កងទ័ព ជាពិសេសយោធិនវ័យក្មេងដែលជាអ្នកបន្តវេន ដើម្បីឆ្លើយតបទៅនឹងភារកិច្ច និងតាមសេចក្ដី ត្រូវការនៃខឿនការពារជាតិ។

ឧត្តមសេនីយ៍ឯក អ៊ួន សារឿន បានបន្តទៀតថារាជរដ្ឋាភិបាល ក្រសួងការពារជាតិ អគ្គបញ្ជាការ នៃកងយោធពលខេមរភូមិន្ទ បញ្ជាការដ្ឋានកងទ័ពជើងគោក បានយកចិត្តទុកដាក់លើការងារហ្វឹកហ្វឺនឲ្យដល់គ្រប់បណ្ដាប្រភេទជំនាញទ័ព តាមលំដាប់ថ្នាក់ បណ្ដាកងឯកភាព ពីលើដល់ក្រោម ទាំងជំនាញ និងយុទ្ធវិធីផ្សេងៗ។

ជាក់ស្តែងថ្ងៃនេះ នៅសាលាតេជោសែនជុំគិរី បានដំណើរការបើកវគ្គហ្វឹកហ្វឺនបំប៉នជំនាញក្រុមបាញ់កាំភ្លើងដៃ កងទ័ពជើងគោក (AARM/32) និងវគ្គបំប៉នជំនាញបាញ់កាំភ្លើងដៃជើងគោក អូស្ត្រាលី (AASAM/22) ឆ្នាំ២០២៤ ដើម្បីត្រៀមចូលរួមប្រកួតបាញ់កាំភ្លើងដៃ កងទ័ពជើងគោក (AARM/32) និងវគ្គបំប៉នជំនាញបាញ់កាំភ្លើងដៃជើងគោក អូស្ត្រាលី (AASAM/22) នាពេលខាងមុខ។

ឧត្តមសេនីយ៍ឯក អ៊ួន សារឿន បានគូសបញ្ជាក់ថា ការមានចំណេះដឹងវាទាមទារនូវបទពិសោធន៍ការងារ, ការទទួលខុសត្រូវ, ការចេះចាត់ចែង ចេះឆ្នៃប្រឌិត, ការប្រើវាចាប្រកបដោយភាពទន់ភ្លន់ តែម៉ឺងម៉ាត់លើការងារ, ភាព ស្និទ្ធស្នាលជាមួយបងប្អូនគ្រប់ជាន់ថ្នាក់ក្នុងអង្គភាព, មានឆន្ទៈមុះមុត, ការផ្សព្វផ្សាយផែនការការងារ និងទិសដៅឱ្យបានច្បាស់លាស់, និងមានសាមគ្គីភាព ឯកភាពផ្ទៃក្នុងបានល្អ។

ឧត្តមសេនីយ៍ឯក អ៊ួន សារឿន មានសង្ឃឹមយ៉ាងមុតមាំចំពោះការខិតខំប្រឹងប្រែង និងមានជំនឿជឿជាក់ លើសមត្ថភាពរបស់អស់លោកជាកម្មសិក្សាការី សិក្ខាកាមវគ្គហ្វឹកហ្វឺនបំប៉នជំនាញកាំភ្លើងដៃកងទ័ពជើងគោក (AARM/៣២/២០២៤), វគ្គបំប៉នជំនាញបាញ់កាំភ្លើងដៃកងទ័ពជើងគោកអូស្រ្តាលី (AASAM២២/២០២៤) ទាំងអស់ត្រូវយកចិត្តទុកដាក់រៀនសូត្រ មានវិន័យខ្ពស់ ត្រូវគោរពវិន័យបទបញ្ជាផ្ទៃក្នុងវគ្គ មានសាមគ្គីផ្ទៃក្នុងល្អ និងគោរពពេលវេលារៀនសូត្រអោយបានទៀងទាត់ មានអត្តចរិកល្អសាកសមជាកងយោធពលខេមរភូមិន្ទ និងបានសំណូមពរដល់គ្រូយោធាចារ្យត្រូវខិតខំរិះរកគន្លឹះ និងទ្រឹស្តីល្អៗ ធ្វើយ៉ាងណាឲ្យសិក្ខាកាមងាយយល់ ពេលបញ្ចប់វគ្គទទួលបានលទ្ធផលល្អ៕