ឯកឧត្តម ណាប់ ប៊ុនហេង និងឯកឧត្តម ញ៉ែម សំអឿន អញ្ជើញប្រកាសមន្ត្រីរាជការចំនួន ១៧រូប ចូលកាន់មុខតំណែងថ្មីនៃរដ្ឋបាលសាលាខេត្តរតនគិរី

ភ្នំពេញ៖ នារសៀលថ្ងៃទី៥ ខែកក្កដា ឆ្នាំ២០២៤ ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និងឯកឧត្តម ញ៉ែម សំអឿន អភិបាលខេត្តរតនគិរី បានអញ្ជើញជាអធិបតីក្នុងពិធីប្រកាសមន្ត្រីរាជការចំនួន ១៧រូប ចូលកាន់មុខតំណែងថ្មីនៃរដ្ឋបាលសាលាខេត្ត។

បន្ទាប់ពីឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត សម្តែងនូវការចូលរួមអបអរសាទរចំពោះថ្នាក់ដឹកនាំ មន្ត្រីរាជការទាំង១៧រូបដែលត្រូវបានប្រកាសចូលកាន់មុខតំណែងថ្មីរួចមក ឯកឧត្តម ញ៉ែម សំអឿន អភិបាលខេត្ត បានលើកឡើងថា រាជរដ្ឋាភិបាលនីតិកាលទី៧ នៃរដ្ឋសភា ជារាជរដ្ឋាភិបាលបន្តវេន ក្រោមការដឹកនាំដ៏ប៉ិនប្រសព្វ វាងវៃទន់ភ្លន់ តែម៉ឺងម៉ាត់របស់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ជារបៀបវារៈនៃការអភិវឌ្ឍសង្គមសេដ្ឋកិច្ច របស់កម្ពុជាក្នុងរយៈពេល ២៥ឆ្នាំខាងមុខ។ ហើយយុទ្ធសាស្ត្របញ្ចកោណដំណាក់កាលទី១ មានបាវចនា ៥ គឺ៖ កំណើន, ការងារ, សមធម៌, ប្រសិទ្ធភាព និងចីរភាព កំណត់យកអាទិភាពគន្លឹះ ៥ គឺ៖ មនុស្ស, ទឹក, ភ្លើង, ផ្លូវ និងបច្ចេកវិទ្យា ជាពិសេសគឺ បចេកវិទ្យាឌីជីថល។

ឯកឧត្តម ញ៉ែម សំអឿន បានផ្តាំផ្ញើ ដល់អស់លោក លោកស្រីទាំង១៧រូប ដែលបានប្រកាសចូលកាន់មុខតំណែងថ្មី ត្រូវចូលរួមសហការពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ទំនាក់ទំនងការងារឲ្យបានល្អនៅក្នុងអង្គភាពរបស់ខ្លួន ដោយឈរ
លើមូលដ្ឋាននៃការលើកកម្ពស់ប្រសិទ្ធ ភាពការងារ និងធានានិរន្តភាពការងាររបស់ខ្លួន ឲ្យកាន់តែមានភាពល្អប្រសើរក្នុងការជួយក្រុមប្រឹក្សា និងគណៈអភិបាលខេត្ត ដូចខាងក្រោម៖

ទី១.ត្រូវចូលរួមលើកកម្ពស់ការផ្តល់សេវាសាធារណៈទាំងសេវាតម្រូវការ និងសេវាសំណូមពរ ជូនប្រជាពលរដ្ឋឲ្យបានល្អប្រសើរ និងមានប្រសិទ្ធភាព។

ទី២.ត្រូវយកចិត្តទុកដាក់ពង្រឹងសមត្ថភាព និងសីលធម៌វិជ្ជាជីវៈក្នុងការបំពេញការងាររបស់មន្ត្រីក្នុងការបំពេញការងារដើម្បីឱ្យប្រជាពលរដ្ឋទទួលបានសេវារដ្ឋបាលនានា កាន់តែងាយស្រួលឆាប់រហ័ស មានតម្លាភាព និងគណនេយ្យភាព។

សូមបញ្ជាក់ផងដែរថា ថ្នាក់ដឹកនាំ មន្ត្រីរាជការចំនួន១៧រូបដែលប្រកាសចូលកាន់មុខតំណែងថ្មីនៃរដ្ឋបាលសាលាខេត្តរតនគិរីរួមមាន៖ ប្រធានការិយាល័យប្រជាពលរដ្ឋ ១រូប, អនុប្រធានការិយាល័យប្រជាពលរដ្ឋ ១រូប, នាយករងរដ្ឋបាលសាលាខេត្ត ២រូប, ប្រធានផ្នែក ២រូប, នាយករងទីចាត់ការ ២រូប, អនុប្រធានផ្នែក ៣រូប, អនុប្រធានអង្គភាព ១រូប, ប្រធានការិយាល័យ ២រូប និងអនុប្រធានការិយាល័យ ៣រូប ៕