ឯកឧត្តម ជា វុទ្ធី ជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្ស សាលាបឋមសិក្សាសឡា ក្នុងសង្កាត់ស្ទឹងមានជ័យទី១
ភ្នំពេញ៖ ឯកឧត្តម ជា វុទ្ធី អគ្គលេខាធិការវិនិយោគកម្ពុជា និងជាប្រធាន ក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ នាថ្ងៃទី៦ ខែកក្កដា ឆ្នាំ២០២៤ បានអញ្ជើញដឹកនាំក្រុមការងារចុះជួបសំណេះសំណាលជាមួយលោកគ្រូ អ្នកគ្រូ ព្រមទាំងក្មួយៗសិស្សានុសិស្សនៃសាលាបឋមសិក្សាសឡា ស្ថិតក្នុងសង្កាត់ស្ទឹងមានជ័យទី១ នៃខណ្ឌមានជ័យ រាជធានីភ្នំពេញ ដើម្បីស្វែងយល់អំពីស្ថានភាពទូទៅ បញ្ហាប្រឈម ក៏ដូចជាសំណូមពរនានារបស់សាលា សំដៅរួមចំណែកជំរុញ និងលើកកម្ពស់បរិយាកាសសិក្សា និងការអប់រំក្នុងមូលដ្ឋានឱ្យកាន់តែប្រសើរឡើងបន្ថែមទៀត ដោយផ្តោតជាសំខាន់ទៅលើផ្នែកគុណភាព ប្រសិទ្ធភាព និងបរិយាបន្ន ក្នុងការបណ្តុះបណ្តាលធនធានមនុស្សជំនាន់ក្រោយ ដែលនឹងក្លាយជាសសរទ្រូង និងកម្លាំងស្នូល សម្រាប់ការចូលរួមក្នុងកិច្ចអភិវឌ្ឍន៍សង្គម សេដ្ឋកិច្ចជាតិ ឱ្យកាន់តែមានភាពរីកចម្រើននាពេលអនាគត។
ពិធីនេះ បានប្រព្រឹត្តទៅដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី សមាជិក សមាជិកាក្រុមការងារ និងសមាជិកក្រុមប្រឹក្សាសង្កាត់ ព្រមទាំង លោកគ្រូ អ្នកគ្រូ ក្មួយៗសិស្សានុសិស្ស និងបុគ្គលិកសាលា សរុបប្រមាណជិត ១.៦០០ នាក់។
ក្នុងឱកាសនោះ ឯកឧត្តម ព្រមទាំងសហការីក្រុមការងារ ក៏បានអញ្ជើញចុះពិនិត្យតាមបន្ទប់សិក្សា និងសំណេះសំណាលជាមួយក្មួយៗសិស្សានុសិស្ស និងបានផ្តល់ជូននូវតុសិក្សាសរុបចំនួន ៣១ តុ, សម្ភារៈសិក្សារួមមាន សៀវភៅ និងប៊ិក ចំនួន ១.៦០០ ឈុត ព្រមទាំងថវិកាមួយចំនួន សម្រាប់ឧបត្ថម្ភជូនដល់ លោកគ្រូ អ្នកគ្រូ ក្មួយៗសិស្សានុសិស្ស បុគ្គលិកសាលា ព្រមទាំងបងប្អូនប្រជាការពារក្នុងមូលដ្ឋានផងដែរ។
ជាមួយគ្នានេះ តបតាមសំណូមពររបស់គណៈគ្រប់គ្រងសាលា និងក្មួយៗសិស្សានុសិស្ស ឯកឧត្តមប្រធានបានសន្យានឹងធ្វើការកៀរគរសប្បុរសជនជិតឆ្ងាយដើម្បីជួយក្រាលការ៉ូឡាក្នុងបរិវេណសាលាសម្រាប់ជំហានបន្ទាប់ និងការកសាងអគារសិក្សាមួយខ្នងបន្ថែមនៅពេលខាងមុខ ៕
